Teatri i Qytetit të Gjilanit dhe gjurma artistike e Bedrije Rexhepit

Gjilan – Historia e Teatrit të Qytetit të Gjilanit është e pandashme nga emrat që i dhanë jetë, zë dhe identitet, e ndër ta zë vend të veçantë Bedrije Rexhepi, aktore dhe këngëtare, talenti i së cilës la gjurmë të pashlyeshme në skenën teatrore gjilanase që nga viti 1975.

E lindur në Malishevë të Gjilanit, Bedrije Rexhepi e nisi rrugëtimin e saj artistik herët, e udhëhequr nga dashuria për teatrin dhe muzikën, dy fusha që do ta shoqëronin gjatë gjithë jetës së saj krijuese.

Në një rrëfim për rajonipress, ajo kujton me emocione vitet e para të angazhimit në Teatrin e Qytetit, rolet e bukura të interpretuara përkrah aktorëve të njohur, këngët dhe tekstet e shfaqjeve që edhe sot i ruan përmendësh, si dhe jetën e saj të mëvonshme në Kanada.

Për disa vite me radhë, Bedrije Rexhepi ishte zëri, talenti dhe figura femërore që identifikohej ngushtë me veprimtarinë e Teatrit të Qytetit të Gjilanit. Që nga viti 1975, ajo u shfaq në skenë përkrah emrave të shquar të teatrit kosovar, si: Jashar Shahiqi, Sabedin Shahiqi, Muharrem Sylejmani, Ruzhdi Mehmeti, Naser Zymberi, Mejreme Berisha, Shpresa Vokshi Hajdari, Xhevahire Murtezi, e shumë të tjerë, duke kontribuar në ndërtimin e një periudhe që sot konsiderohet si një epokë e artë e teatrit lokal.

“Teatrin dhe muzikën i kam dashur që nga fëmijëria. Me to jam marrë natyrshëm, deri në momentin kur u inkuadrova në Teatrin e Qytetit, ku kalova disa nga vitet më të bukura të jetës sime,” shprehet Bedrija, duke rikthyer kujtime nga ajo kohë.

Ajo veçon me krenari shfaqjet që i kanë mbetur thellë në zemër dhe kujtesë, si “Dasmë në luftë”, “Kryet e hudrës” dhe “Banesa e përbashkët”, të gjitha në regji të Muharrem Shahiqit. “Janë shfaqje që i mbaj ende në zemër dhe tekstet e të cilave i di përmendësh edhe sot,” thekson ajo.

Bedrije Rexhepi kujton gjithashtu sfidat e kohës, veçanërisht për gratë në art. “Ishim vetëm katër femra në teatër: Xhevahire Murtezi – Shahiqi, Mejreme Berisha, Shpresa Vokshi – Hajdari dhe unë. Megjithatë, grupi i artistëve funksiononte si një familje e madhe, ku mbizotëronte respekti dhe dashuria për artin,” thotë ajo.

Në veçanti, Bedrija flet me admirim për regjisorin Muharrem Shahiqi, të cilin e përshkruan si një figurë të pazëvendësueshme të teatrit. “Ishte artist i madh, regjisor i përkushtuar dhe shumë i afërt me ne. Na trajtonte si fëmijët e tij,” kujton ajo me emocione.

Sot, Bedrije Rexhepi jeton në Kanada, së bashku me familjen dhe bashkëshortin e saj, Zeqirja Rexhepin, krijues dhe piktor me përmasa ndërkombëtare. Ajo është gjithashtu nëna e këngëtares së njohur Tringa Rexhepi, duke dëshmuar se trashëgimia artistike vazhdon brez pas brezi.

Përveç veprimtarisë artistike, Bedrije Rexhepi është edhe stiliste dhe drejton biznesin e saj me emrin “Hair By Bea”, duke dëshmuar se krijimtaria nuk njeh kufij as në kohë, as në hapësirë./rajonipress/