Gjilan -Me dy barazime e dy humbje, futbollistët e Dritës janë kthyer nga Turneu Ndërkombëtar i Futbollit për kategori të reja që është mbajtur në qytetin Bursa të Turqisë.
Fillimi i turneut ka qenë më i vështirë për futbollistët e Dritës, të cilët në këtë turne ishin përforcuar edhe me katër lojtarë të KF Gjilani. Fillimisht Drita është përballë me ekipin më të mirë të turneut Bursa dhe ka pësuar me rezultat 2:4 e më pas është ballafaquar edhe me ekipin e Shkupit, nga i cili ka pësuar me rezultat 0:1.
Refik Rexhepaj, koordinator i kategorive të reja në KF Drita, tha se në dy ndeshjet e para kanë luajtur mirë, por ekipit iu desh një kohë që të ambientohet me temperaturat e larta në Turqi. Ai tha se pas këtyre dy rezultateve të disfavorshme, në shprehje erdhi forca e ekipit të Dritës që me rezultat bindës ngadhënjeu ndaj ekipit Pllovdiv nga Bullgaria e me rezultat të njëjtë gjilanasit ngadhënjyen edhe ndaj Teutës së Durrësit.
Sipas Rexhepajt, mikpritësit janë ndër shumë të kënaqur me paraqitjen e ekipit gjilanas, i cili në Turqi hasi në mikpritje të ngrohtë, ishte i denjë për këtë turne tejet të fortë, kurse gjetën edhe përkrahjen e bashkatdhetarëve tanë në Turqi.
KF Drita nga Gjilani, në radhët e saj pati individë të shkëlqyer, siç ishin të parët e sulmit dhe të mbrojtjes Fidan Sejdiu e Besmir Korbi. KF Drita është radhitur e pesta në këtë turne, me 10 gola të shënuar dhe 5 të pranuar, duke arkëtuar 6 pikë. Në turne morrin pjesë ekipe nga të gjitha vendet e Ballkanit./rajonipress/
