Të rinjtë do të përkrahen në mënyrë të përhershme

Gjilan –Veton Nevzadi i ka inkurajuar të rinjtë për shtim të mëtejmë të aktiviteteve rinore, duke theksuar se do të përkrahë secilën nismë të të rinjve e cila përkon me përcaktimet programore të drejtorisë të cilën ai e drejton.

Drejtorati për Rini, Kulturë dhe Sport i Komunës së Gjilanit në lokalet e KVRL-së ka shënuar Ditën Ndërkombëtare të Rinisë për këtë vit përmes një tryeze tematike të organizuar së bashku me të rinj nga grupmoshat e ndryshme të komunës së Gjilanit.

Tryeza e organizuar kishte për qëllim stimulimin e aktiviteteve rinore si dhe përfshirjen sa më të madhe të të rinjve në zhvillimet e rëndësishme shoqërore në Komunën e Gjilanit, e poashtu edhe informimin e tyre për mundësitë qe u ofron aktualisht rregullativa ligjore ne Kosovë.

Veton Nevzadi, drejtor i DRKS-së ka folur për angazhimet e vazhdueshme të Komunës së Gjilanit e në veçanti të Kryetarit të Komunës Qemajl Mustafa për funksionalizimin e Këshillit të Veprimit Rinor Lokal në Gjilan, sigurimin e hapësirave të nevojshme për funksionimin e saj, duke qenë çdoherë pranë të rinjve në aktivitetet e tyre të përhershme.

Nevzadi në këtë rast i inkurajoi të rinjtë për shtim të mëtejmë të aktiviteteve rinore, duke theksuar se do të përkrahë secilën nismë të të rinjve e cila përkon me përcaktimet programore të drejtorisë të cilën ai e drejton. Në mënyrë të veçantë do t`i japim rëndësi vullnetarizmit duke vendosur kontakte me secilën organizatë rinore dhe me secilin të ri që është interesuar që të përfshihet në grupet e të rinjve të cilët merren me aktivitete rinore, shtoi më tutje Nevzadi.

Kryetari i Këshillit Qendror të Veprimit Rinori Mensur Morina dhe ai KVRL-së në Gjilan Arlind Ajvazi në vazhdim prezantuan një varg aktivitetesh të cilat ky Këshill i ka organizuar prej se ka filluar të jetë aktiv në Komunën e Gjilanit, duke shpresuar në ndihmën e mëtejme të institucioneve.

Albesa Aliu, aktiviste rinore me këtë rast u interesua për mënyrën sesi sanksionohet puna vullnetare e të rinjve, duke inkurajuar institucionet që kjo çështje të normohet me një ligj të veçantë.

Nga ky interesim Aliu mori përgjigje nga zyrtari për rini i DRKS Bujar Haziri, i cili tha se këto rekomandime që dalin nga kjo tryeze do t`i adresojmë si nevoja të komunitetit rinor në Komunën e Gjilanit në kuadër të hartimit të Strategjisë Nacionale për Rini 2013 – 2017.

Ndërsa përfaqësuesi i të rinjve nga Livoqi i Poshtëm Avni Elezi parashtroi kërkesë që të vizitohen edhe aktivistët e zonave rurale të komunës së Gjilanit. /rajonipress/