Të riatdhesuarve iu cenua privatësia

Këshilli për Mbrojtjen e të Drejtave dhe Lirive të Njeriut, ka reaguar për stigmatizimin që Ministria e Punëve të Brendshme i ka bërë qytetarëve të Kosovës, të cilët janë riatdhesuar mëngjesin e së enjtes, me kontingjentin e të kthyerve nga Hungaria.

“Për ne është e papranueshme qysh qeveria i stimulon mediat për të filmuar dhe marrë pamjet për personat të cilët ajo nuk ishte në gjendje që t’i mbajë në vendet e veta. Janë të këqija pamjet e ministrave të cilët nga veturat luksoze bëjnë ftesë për vetëdijesim”, ka thënë Behxhet Shala, nga KMDLNJ.

Shala ka thënë për Tribunën se pamjet e tilla shkelin dhe cenojnë rëndë privatësinë e qytetarëve si dhe i stigmatizojnë ata si kryes të krimeve. Ndërkohë, të enjten në mëngjes, të rinj të moshave nga 20 deri në 30 vjeç, përfshirë gjithashtu edhe gra dhe disa fëmijë janë kthyer nga Hungaria, ku ishin vendosur në përpjekje për të ikur drejt vendeve tjera perëndimore, në kërkim të azilit.(Tribuna)