Të mësuar me çizmen e huaj…

Nga Nexhat Buzuku – Duane veten e tjetrin o njerëz se çizmja e huaj, pushteti i huaj është i ftohtë…Mësohuni t’i respektoni institucionet, kërkoni ndryshime, përmirësime, por mos i urreni pse janë shqiptare!

Jemi bërë pikë e pesë, si vezët e qyqes… Mohimi i tjetrit deri në rrënim. Denigrimin, fyerjen, poshtërimin, shpifjen, etiketimin, injorancën i kemi kthyer në vlerë të zakonshme! Kjo që po ndodh te ne e midis nesh është e pashembullt, e turpshme dhe e pakrahasueshme me të tjerë popuj. Po iu përngjajmë disa specieve shtazore që e hanë njëri-tjetrin brenda llojit e në fund e hanë edhe vetveten!

Një mosdurim i paparë, një urrejtje pa kufij…
Asgjë nuk bën, asgjë nuk vlen! Ai është i keq, ky tjetri nuk bën, ai është kështu e ashtu, mos fol me ate e me këtë…I ku t’i gjejmë të mirët pasi krejt shqiptarët po dalin të jenë të këqinj. Sepse kur dëgjon që secili është kundër secilit, atëherë në këta 1 milion e 500 mijë shqiptarë në Kosovë asnjë nuk del i mirë!

Secili në një mënyrë pretendon se është ligji, është shteti, pasi secili gjykon tjetrin; presidenti është kështu e ashtu, kryeministri është i tillë e i atillë, kryeparlamentari është…, ky kryetar komune i keq, ai para tij edhe më i keq, ai që vjen edhe ai si këta…, Albini nuk bën, Ramushi jo, Pacolli jo, rektori hiq, ministri edhe më hiq, drejtorët e arsimit hiq, të shkollave hiq…

Edhe faj nuk kanë se janë mësue me u përkulë e me u thënë gospodine atyre që i përmenda më lartë, e qe dikur ishin serbe! Bile, më ka tregue një shok që në shkolla dikur nuk kanë guxue kurrë me u vonue në orë mësimi, e lëre me dalë para kohe prej mësimit e për te tjerat as bëhet fjale.

Çka t’i bëjsh po na mungon koha e “gospodinave” – dobar dan gospodin direktore (mirëdita z.drejtor)! Prandaj, punët nuk po na ecin mirë, sepse nuk e pranojmë njëri tjetrin, ani me udhëheq shqiptari?!

Ndoshta do të kënaqeshim e t’i ndalnim llafet sikur të kishte mundësi të krijonim diçka të veçantë që nuk e ka bota – nga një shtet për secilin shqiptar!, që i bie nja 7-8 milionë shtete!

Ndoshta Viti i Ri 2017 na kthjellon trurin e na e heq mjegullën nga mendja!