Viti 2012 ishte një vit i suksesshëm për Qendrën Kinematografike të Kosovës dhe industrinë filmike në përgjithësi, pohojnë drejtuesit e QKK’së në komunikatën e tyre vjetore për media
Në mesin e aktiviteteve të numëruara nga QKK është prezenca e parë institucionale e Kosovës në festivalet e mëdha botërore, Berlinale dhe Cannes, por edhe prezenca e saj në të gjitha festivalet rajonale e më gjerë. Pastaj, anëtarësimi i plotë i QKK’së – bashkë me 34 shtete europaine – në organizatën panevropiane për promovimin e filmit ‘European Film Promotion’, nominimi i parë në ‘Shooting Stars 2013’, ku e nominuar nga QKK, Arta Dobroshi do të marrë çmimin në skenën kryesore të Berlinale 2013.
Në mesin e të arriturave të tjera listohen edhe filmat e shkurtër të subvencionuar nga QKK, “Kolona” dhe “Shkurta”. Premiera botërore e filmit “Kolona” të Ujkan Hysajt, u dha në Melbourne (Australi), dh e ai u shpërblye me çmimet kryesor në Monterrey (Meksiko), Vashavë (Poloni) dhe Seul (Kore Jugore), përderisa premiera e filmit “Shkurta”, të Arzana Krajës, u dha në Rio de Janeiro (Brazil), ku edhe u shpërblye.
Dy filma të metrazhit të gjatë, të subvencionuar viteve të kaluara nga QKK, mbajtën premierat në Prishtinë.
Filmi ‘Kthimi’ i regjisores Blerta Zeqiri, me fitoren në Sundance dhe shumë festivale tjera, i solli Kosovës një fokus të veçantë ndërkombëtar. Ky sukses edhe bëri që regjisorja Zeqiri të pranohet si anëtare në Akademinë Europiane të Filmit.
Qendra Kinematografike e Kosovës në 2012 mbështeti financiarisht 15 projekte filmike, nga të cilat 2 prej tyre janë kooproduksione me shtetet tjera. Për herë të parë Kosova futet në kooproduksion me Shqipërinë dhe me Holandën.
Po ashtu edhe paraseleksionimi i filmave për Ballkanin Perëndimor për Berlinale 2013, që u organizua nga QKK në Prishtine në nëntor 2012, konsiderohet si një e arritur e kësaj qendre.
Ndërkaq, për vitin e ardhshëm kjo qendër do të ketë sfida të tjera, ndër të cilat rritja e buxhetit, mungesa e kinemave në Kosovë dhe rrjetit të distribuimit, ndryshimi i Ligjit për kinematografi, aderimi i QKK-së dhe Kosovës në rrjete e asociacione të ndryshme ndërkombëtare, renovimi, rihapja dhe digjitalizimi i kinemave etj.(express)
