Të gjitha dobitë e rozmarinës

Për një përqendrim dhe qarkullim më të mirë të gjakut, konsumoni pak rozmarinë, apo në llambën aromatike qitni disa pika ekstrakt të kësaj bime.

Edhe pse përdoret që nga lashtësia, studimet më të reja kanë treguar se rozmarina është një antioksidues i fortë që ngadalëson procesin e plakjes.

Rozmarina përmban flavonoide, të cilat e stimulojnë qarkullimin e gjakut, i forcojnë kapilarët dhe përmirësojnë rrjedhjen e gjakut në vena.

Çaji i rozmarinës largon dhembjen e kokës, kurse tinktura e saj, e aplikuar me masazh, ndihmon te reuma.

Majat, gjethet dhe lulet e rozmarinës mund të përgatiten si çaj, i cili përpos dhembjes së kokës, largon edhe ngërçet e lukthit dhe qetëson sëmundjet nervore.

Një lugë gjethesh të freskëta, apo të thara, të rozmarinës, përvëloni me një filxhan ujë, duke i lënë që të qëndrojnë 15 minuta. Kullojeni, i pini dy filxhanë në ditë. Mos e pini në mbrëmje, meqë ju lë pa gjumë. Tinktura e rozmarinës përgatitet duke mbuluar 20 g rozmarinë me 100 ml alkool, duke e lënë që të qëndrojë dhjetë ditë. Më pas konsumoni 15 deri 20 pika në ditë, të vendosura në një gotë ujë.