Të formohet sa më shpejt qeverisja e re lokale

Gjilan-Lëvizja për Kthim dhe Integrim “Guri i Zi”, kërkon nga spektri politik i Komunës së Bujanocit, që sa më shpejt ta formojnë qeverisjen e re lokale, sipas afatit të procedurave ligjore.

Në një reagim të Lëvizjes për Kthim dhe Integrim thuhet se ditët po kalojnë e partitë politike shqiptare, të cilat e kanë fituar shumicën e këshilltarëve komunalë, në zgjedhjet e 6 majit të këtij viti, shtyhen me inate e lokalizma për t’u mos u marrë rreth gjetjes së partnerëve të koalicionit për ta themeluar Kuvendin e ri komunal.

“Në se votuesit shqiptarë,shprehën vullnetin e tyre maksimal, që subjektet shqiptare të kenë më shumë ulëse në parlamentin e ri lokal, pse atëherë liderët partiakë shtyhen me bryla e ndërskamca, për ta zvarritur realizimin e vullnetit të qytetarëve të shprehur me votim”thuhet në reagim.

Në se ne themi se këto zgjedhje për dallim nga ato tri të mëparshmet janë më historike, ngase nga shuma e përgjithshme me këshilltarëve sa ka Kuvendi komunal kanë arritur të sigurojnë 30 mandate, pse atëherë gjenden në mesin e partive politike shqiptare individë e grupacione, të cilat favorizojnë opsionet për formimin e qeverisjes lokale me partitë serbe, të cilat në këto zgjedhje mezi arritën të sigurojnë 11 mandate.

Fatmir Sopi kryetar i Lëvizja për Kthim dhe Integrim “Guri i Zi”, apelon te subjektet politike shqiptare, të mos luajnë me fatin e zgjedhësve të tyre, të cilët në kushte gati të jashtëzakonshme dolën masivisht nëpër vendvotime për të votuar të përfaqësuesit e tyre legjitim, në mënyrë që ata t’i realizojnë kërkesat e tyre me rrugë institucionale.

Lëvizja për Kthim dhe Integrim “Guri i Zi”, këtë zvarritje të formimit të institucioneve komunal e sheh si një rrugë e rrezikshme e krijimit të një vakumi institucional, i cili po i shkon për shtati Beogradit për të krijuar tensione në Luginë si dhe për të marrë ekspedita në bastisjen e arrestimin e ish ushtarëve të UÇPMB-së.

Lëvizja për Kthim dhe Integrim “Guri i Zi”, kërkon me urgjencë thirrjen e një mbledhjeje të përbashkët të partive shqiptare pjesëmarrëse të zgjedhjeve në Komunën e Bujanocit, për të vendosur sa më shpejt partnerët e koalicionit për formimin e Kuvendit të ri komunal, përndryshe jemi të detyruar t’i thërrasim qytetarët në protesta për ta mbrojtur votën e lirë, dinjitetin e zgjedhësve dhe imazhin e komunës sonë përfundon reagimi./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).