Të dhënat për rritje të punësimit, të pasakta dhe me prapavijë politike

Të dhënat e dala nga Agjencia e Statistikave të Kosovës (ASK), për rritje të punësimit prej 2.8 për qind, kanë ngjallur reagime të disa institucioneve në vend.

E ai që s’pajtohet kurrsesi me këto të dhëna, është kryetari i Odës Ekonomike të Kosovës (OEK) Safet Gërxhaliu, sipas të cilit të dhënat e publikuara nga ASK për rritje të punësimit prej 2.8 për qind, janë krejtësisht të pasakta dhe me prapavijë politike.

Edhe njohësi i çështjeve ekonomike, Ibrahim Rexhepi, thotë për KosovaPress se shifrat e dala nga ASK, lënë shumë për të dëshiruar dhe se japin një pasqyrë të deformuar. Ndërsa pohon se edhe nëse do të donin ta pranonin si shifër të vërtetë,atëherë duhet të dihej se ku janë këta njerëz të punësuar, kur dihet që në sektorin privat, më shumë ka largim të punëtorëve nga puna se sa punësim. E ndërkaq sektori publik, është i stërngarkuar dhe nuk ka mundësi që të absorboj fuqi të re punëtore.

Por një vlerësim i tillë, nuk është aspak korrekt për Bashkim Bellaqen, nga ESK-ja. Ai i ka thënë KosovaPress-it se të dhënat për rritje të punësimit, të publikuara ditë më parë nga ky institucion, janë plotësisht të sakta. Ai tha se ASK-ja është një institucion apolitik dhe se të dhënat e dala nga ky institucion janë plotësisht të sakta. Ndërsa thekson se nuk e ka ndërmend të ia mbush mendjen askujt, që dyshon në të dhënat e dala nga institucioni në fjalë.

Ndryshe, sipas rezultateve të Anketës së Fuqisë Punëtore, të dala për vitin 2013, në Kosovë kemi një përmirësim të shkallës së punësimit, ndërsa shkalla e papunësisë ka një rënie të lehtë.

Nëse krahasohen me rezultatet e AFP-2012, në vitin 2013 kemi një rritje të shkallës së punësimit për rreth 2.8%.