Të çmontohen strukturat e Serbisë në veri të Kosovës!

Ministria e Punëve të Jashtme të Shqipërisë (MPJ) ka reaguar për situatën në veri të Kosovës.

Me anë të një deklarate, Ministria e Jashtme e Shqipërisë dënon ashpër dhunën e përsëritur të strukturave paralele dhe bandave kriminale serbe kundër trupave paqeruajtës të KFOR-it në fshatin Rudarë.

“MPJ mbështet vendosmërinë e Qeverisë së Republikës së Kosovës për ushtrimin e sovranitetit të saj, vendosjen e rendit e ligjit për të siguruar lirinë e lëvizjes në të gjithë territorin, në bashkëpunim të ngushtë me KFOR-in dhe EULEX-in”, thuhet në reagimin e Ministrisë së Jashtme.

Nga ana tjetër, MPJ kërkon dënimin e autorëve që plagosën paqeruajtësit në këtë zonë të Kosovës.

“Duke i uruar shërim të shpejtë paqeruajtësve të plagosur në aksionin për të siguruar lirinë e lëvizjes në veri të Kosovës, theksojmë se nxjerrja para drejtësisë e autorëve të dhunës, si dhe çmontimi i strukturave paralele e kriminale serbe të sigurisë janë imperative për të vendosur rendin dhe ligjin edhe në këtë pjesë të vendit”, thuhet në reagimin e MPJ-së. /Telegrafi/

Shpërndaje.
© RAJONIPRESS