Tatimi në pronë shënon rënie

Gjilan – Zijadin Maliqi thotë se për 180 mijë euro ka më pak hyrje tek tatimi në pronë shkaku i kushtëzimeve. Nazmi Halili tha se është e vërtet se ka rënie dhe sipas tij qytetarët veturat po i regjistrojnë në Artanë, Viti e Kamenicë.

Arka komunale që deri dje mbushej nga të hyrat e tatimit në pronë ka nisur të zbrazet krahasuar me vitet paraprake. Këtë shqetësim e ka bërë publik Zijadin Maliqi nga komisioni për ekonomi i LDK-së.

Sipas Maliqit të hyrat e tatimit në pronë krahasuar me vitin e kaluar kanë shënuar rënie për 180 mijë euro. Maliqi tha se kjo rënie po ndodhë për shkak të kushtëzimeve që ka aplikuar Kuvendi Komunal për dy kompanitë publike “Hidromorava” dhe “Higjiena”.

Maliqi mendon se ky hap është kontraproduktiv sepse mjetet financiare po derdhen në komunat e tjera dhe realisht qytetarët po ikin në komunat e tjera. Maliqi ka kërkuar që urgjentisht Asambleja Komunale ta shfuqizojë këtë vendim.

Ndërkaq Nazmi Halili shef i tatimit në prone tha se është e vërtetë se ka rënie të tatimit në pronë dhe kjo për shkakun se qytetarët duke ikur nga kushtëzimet po shkojnë në qytetet tjera. Sipas tij qytetarët gjilanas më së shumti po shkojnë në Kamenicë, Viti e Artanë.

Halili nuk dha ndonjë shifër se për sa po dëmtohet sektori i tatimit në pronë shkaku i kushtëzimeve , por tha se do të ishte me interes që vërtet ai kushtëzim të hiqet sepse është ngarkesë shumë e madhe për xhepin e qytetarit./rajonipress/