Takohen Blatter, Vokrri e Karaxhiq

Data 29 e këtij muaji mund të sjell risi për futbollin kosovar. I pari i futbollit botëror, Sepp Blatter do të ulë për herë të parë në një tavolinë kryetarin e Federatës së Futbollit të Kosovës, Fadil Vokrri dhe atë të Serbisë, Tomislav Karaxhiq. Lajmi bëhet i ditur nga mediat serbe, derisa pala kosovare ende nuk ka marrë ndonjë ftesë.

Në fakt, ka qenë transparenti “Pranojeni Kosovën në UEFA”, i shpalosur në ndeshjen Bayern Munich – Plzen, që ka nxjerrur fjalët e Karaxhiqit për takimin.

“Ky është edhe një tentim në serinë e presioneve që bëhen ndaj UEFA-s dhe FIFA-s, krejt kjo para takimit tonë të përbashkët më 29 tetor, në të cilin sërish do të diskutohet për përpjekjet e pranimit të Kosovës për zhvillimin e ndeshjeve zyrtare”, deklaroi Karaxhiq për ‘alo.rs’.

Transparenti ishte shpalosur në gjuhën angleze, nga disa shqiptarë që veprojnë në Gjermani…(Tribuna – Arena).