Surroi: Përtëritja e mandateve të rezervuara është e rrezikshme

Kërkesën e disa deputetëve të Kuvendit të Kosovës për përtëritjen e mandateve te rezervuara, Veton Surroi e cilëson si tentim rinegociimi të Pakos së Ahtisarit, bën të ditur KTV.

Surroi, i cili gjatë procesit negociator të ndërmjetësuar nga Marti Ahtisaari, udhëhoqi grupin e komuniteteve, ka reaguar lidhur me këtë kërkesë, duke tërhequr vërejtjen se kjo do të ishte shumë e rrezikshme për disa arsye.

“Deputetët që e iniciojnë ndryshimin e kësaj norme juridike, sikundër edhe ata që pranojnë këso iniciativa , duhet të jenë të vetëdijshëm se po e hapin Paketën e Ahtisaarit, e cila u arrit me dy forma të konsensusit, atij mes shqiptarëve dhe komuniteteve pakicë, si dhe atij mes Kosovës dhe vendeve që e përkrahën pavarësinë e vendit. Rihapja e pakos mund të ketë së paku dy lloj pasojash imediate. Së pari, të hapë rrugën e precedencës për çdonjërin që është i pakënaqur me këtë Pako (e të këtillë me siguri se mund të ketë më shumë nga radhët e shumicës), që të fillojë ndryshimet që i shohin si të nevojshme, duke e prishur balancën e arritur në Pakon e Ahtisaarit. Së dyti, të problematizojë sërish debatin mbi marrëdhëniet etnike në Kosovë, si parahyrje për negociatat politike mes Prishtinës dhe Beogradit”, theksohet në reagimin e Surroit.