Surroi: Interesi është çështja kyçe në marrëdhëniet mes Kosovës dhe Shqipërisë

Publicisti Veton Surroi dhe eksperti i telekomunikacionit Ismet Hamiti në podcastin PIKË analizuan edhe marrëdhëniet ndërmjet Kosovës dhe Shqipërisë, duke theksuar rëndësinë e bashkëpunimit të mëtejshëm mes dy vendeve.

Hamiti e përshkroi situatën si dy realitete të ndryshme, të cilat kanë filluar të komunikojnë gjithnjë e më shpesh dhe më larmishëm, duke u përpjekur të tejkalojnë dallimet historike dhe gjeografike.

Për Surroin, fjala kyçe për avancimin e marrëdhënieve mes Kosovës dhe Shqipërisë është interesi.

Ai theksoi se dy shtetet kanë interes të bashkëpunojnë shumë më intensivisht dhe se ky bashkëpunim është më i lehtë të realizohet për shkak të afërsisë kulturore dhe njëhsisë kulturore, pavarësisht diferencave të ekzistuara gjatë periudhës së ndarjes.

Ai solli shembuj nga historia, si ndarja mes Gjermanisë Lindore dhe Perëndimore, për të treguar se edhe me dallime të thella, interesi i përbashkët mund të jetë një forcë unifikuese.

Surroi dhe Hamiti u dakorduan se është e rëndësishme që Kosova dhe Shqipëria të identifikojnë dhe shfrytëzojnë interesat e përbashkëta për të thelluar më tej bashkëpunimin dhe për të ndihmuar në forcimin e marrëdhënieve të tyre./Koha/