Surdulli kundër sjelljes tendencioze të disa mësimdhënësve

Gjilan -Kryetari i Kamenicës, Shaip Surdulli, është shprehur në mbledhjen e Kuvendit se sjelljet tendencioze të disa mësimdhënësve ndaj nxënësve kanë nxitur akte dhune ndaj tyre.

Ai i ka ftuar mësimdhënësit që ta ruajnë kryet dhe shpinën, nëse guxojnë të provokojnë situata.
“Sulmet fizike nuk mund t’i përjashtojmë. Edhe mua mundet me më prit dikush te dera tash edhe me më sulmua”, ka thënë Surdulli. Kur të punosh në mënyrë tendencioze, u shpreh më tej kryetari i komunës, duke iu referuar Mirsad Bashës dhe disa kolegëve të tij profesorë, atëherë çdo gjë mund të ndodh.
“Basha dhe disa profesorë të tjerë në mënyrë tendencioze kanë thurrur plane për t’i ngelë disa femra të shkollës së mesme. Edhe unë kam punuar dhe vazhdoj të punoj në arsim. Nxënësi nuk guxon të ngelet, por duhet të mësohet e ti jepet vullnet për mësim”, theksoi Surdulli.

Dhuna në institucione shkollore nxiti debat në mbledhjen e sotme të Kuvendit të Kamenicës. Drejtoresha e Arsimit, Fahrije Kryeziu, deklaroi se Kamenica qëndron relativisht mirë në krahasim me komunat e tjera sa i përket sigurisë në shkolla.

Këshilltarja e PDK-së, Sadushe Agaj, pohoi se niveli i dhunës nëpër shkolla po bëhet dukuri. Sipas saj, ky është një problem serioz me të cilin duhet të merren të gjithë.
“Së fundi kemi pasur katër, pesë raste të sulmeve fizike ndaj profesorëve, gjë e cila ndikon edhe në uljen e kualitetit dhe kriteriumit nëpër shkolla”, tha Agaj./rajonipress/

Shpërndaje.
© RAJONIPRESS