Sulimani shënon ndaj Shalës

Benjamin Sulimani po kalon nëpër një formë mjaft të mirë në futbollin norvegjez. Kjo pasi sulmuesi shqiptar i Vikingut e ka realizuar golin e tretë në po aq ndeshje sa i ka zhvilluar deri më tani në elitën e futbollit norvegjez.

Të shtunën, Sulimani ishte titullar i Vikingut që ishte mysafir i Oddit. Ai ka realizuar gol në minutën e 62-të, por fitoren ekipit të tij ia ka mohuar Berge në minutën e 90, kur ka shënuar për 1:1.

Sulimani ka luajtur deri në minutën e 62-të, kur është zëvendësuar nga bashkëkombësi i tij, Veton Berisha.

Duhet theksuar se për Oddin gjatë gjithë ndeshjes ka luajtur futbollisti tjetër shqiptar, Herolind Shala. Vikingu pas nëntëmbëdhjetë xhirosh pozicionohet në vendin e tretë të tabelës së klasifikimit me 31 pikë, nëntë më pak sesa lideri Rosenborg. Kurse Odd është i shtati me 25 pikë.