Stuhia godet Vitinë, fermerët përballen me dëme të konsiderueshme në sera

Viti – Dëme të mëdha materiale janë raportuar në disa zona të Komunës së Vitisë pas stuhisë së fuqishme që ka përfshirë rajonin, me sektorin e bujqësisë ndër më të prekurit.

Drejtori i Bujqësisë në Komunën e Vitisë, Naim Pira, ka bërë të ditur se reshjet dhe erërat e fuqishme kanë shkaktuar dëme të konsiderueshme në pronat e fermerëve, veçanërisht në serat bujqësore.

Përmes një postimi në rrjetet sociale, Pira ka publikuar pamje nga fshati Skifteraj, ku pasojat e stuhisë janë të dukshme në strukturat e serave dhe hapësirat bujqësore.

“Pas stuhisë së sotme që ka kapluar Komunën e Vitisë, shumë fermerë kanë pësuar dëme të konsiderueshme materiale në pronat e tyre, veçanërisht në serat e tyre”, ka shkruar Pira.

Ai ka paralajmëruar se dëme mund të ketë edhe në lokalitete të tjera të komunës, duke kërkuar vëmendje ndaj gjendjes së fermerëve të prekur.

Stuhitë e tilla paraqesin goditje të drejtpërdrejtë për bujqësinë, veçanërisht për fermerët që kanë investuar në sera dhe kultura të mbrojtura. Vlerësimi i plotë i dëmeve pritet të bëhet pas evidentimit të të gjitha rasteve në terren./rajonipress/