Studimi i Cambridge: Truri i njeriut kalon katër “pika kthese” gjatë jetës

Një studim i realizuar nga studiues të University of Cambridge ka zbuluar se truri i njeriut nuk zhvillohet në mënyrë lineare, por kalon nëpër katër periudha kyçe të ndryshimeve strukturore, rreth moshave 9, 32, 66 dhe 83 vjeç.

Hulumtimi, i publikuar në revistën shkencore Nature Communications, u bazua në analizën e më shumë se 4.200 skanimeve MRI të trurit të njerëzve nga lindja deri në moshën 90-vjeçare. Sipas studiuesve, këto ndryshime e ndajnë jetën e njeriut në pesë faza të zhvillimit neural.

Në fazën e parë, nga lindja deri rreth moshës 9-vjeçare, truri zhvillohet me ritëm të shpejtë, duke formuar lidhjet nervore që mbështesin të nxënit, gjuhën dhe aftësitë bazë. Nga mosha 9 deri në 32 vjeç vazhdon maturimi i trurit, veçanërisht në zonat që lidhen me vendimmarrjen, kontrollin emocional dhe sjelljen sociale.

Periudha nga 32 deri në 66 vjeç konsiderohet faza më e qëndrueshme e organizimit të rrjeteve nervore. Pas moshës 66-vjeçare fillojnë të shfaqen ndryshime më të dukshme në strukturën e trurit, ndërsa pas moshës 83-vjeçare studiuesit kanë identifikuar një fazë tjetër të riorganizimit të rrjeteve nervore.

Autorët theksojnë se këto mosha nuk përfaqësojnë kufij të prerë biologjikë dhe se ndryshimet nuk ndodhin njësoj te çdo individ. Bëhet fjalë për pika statistikore të identifikuara në një numër të madh pjesëmarrësish, ndërsa zhvillimi i trurit ndikohet edhe nga faktorë të tillë si gjenetika, arsimi, mënyra e jetesës, shëndeti dhe mjedisi.

Sipas studiuesve, gjetjet mund të ndihmojnë në kuptimin më të mirë të zhvillimit të trurit gjatë gjithë jetës dhe të kontribuojnë në kërkimet për shëndetin mendor dhe sëmundjet neurodegjenerative, si demenca dhe sëmundja e Alzheimerit.