Stradivari mes gjësendeve të humbura

Një violinë e Stradivarit, e vlefshme disa milionë euro, të cilën në një tren e kishte harruar një muzicientë anonim, është gjetur në një byro gjësendesh të humbura të stacionit hekurudhor në Bern, njoftoi policia e kryeqytetit zviceran.

Instrumentin e vlefshëm pronari ia kishte huazuar një miku muzicient, i cili, të premten e kaluar, e harroi atë në tren, teksa zbriti në një stacion në Bern.

Megjithatë, falë xhirimit të kamerës së sigurimit, policia arriti të identifikonte një udhëtar që po dilte nga treni me violinë në dorë, por në një stacion tjetër të kryeqytetit zviceran.

Sipas agjencisë AFP, dy ditë pas apelit të policisë për kthimin e violinës, policia arit ta gjejë atë në byronë për gjësende të humbura të stacionit kryesor hekurudhor në Bern.

Policia nuk ka publikuar asnjë emër, e as vlerën e instrumentit.

Ndryshe, aktualisht në botë ekzistojnë 600 violina të punuara nga mjeshtri italian, Antonio Stradivari (1648-1737). Në vitin 2011, një e tillë është shitur në një ankand bamirësie për 13.5 milionë dollarë.