Stagnim dhe pakënaqësi në Gjilan, projekte të bllokuara dhe kritika për qeverisjen lokale

Gjilan – Komuna e Gjilanit po përballet me kritika në rritje nga qytetarët lidhur me mungesën e investimeve dhe vonesat në realizimin e projekteve infrastrukturore. Ndër shqetësimet kryesore përmenden rruga e Prishtina, e cila vijon të mbetet e papërfunduar, si dhe projekti i autostradës Gjilan-Prishtinë, i konsideruar nga shumë banorë si një premtim i parealizuar.

Sipas vlerësimeve të qytetarëve dhe njohësve të zhvillimeve lokale, mungesa e një politike të qartë investimesh dhe e planifikimit afatgjatë ka ndikuar drejtpërdrejt në ngadalësimin e zhvillimit ekonomik dhe urban të qytetit. Ata theksojnë se projekte të rëndësishme kanë mbetur në faza të zgjatura realizimi, duke krijuar frustrim dhe pasiguri për të ardhmen.

Kritikat nuk mungojnë as ndaj udhëheqjes komunale. Një pjesë e opinionit publik vlerëson se qeverisja aktuale nuk ka arritur të përmbushë pritjet, duke ngritur shqetësime për mungesë profesionalizmi dhe angazhimi të mjaftueshëm në zgjidhjen e problemeve kryesore.

Në të njëjtën kohë, përfaqësues të shoqërisë civile theksojnë nevojën për përfshirje më të madhe të ekspertëve dhe kuadrove profesionale në proceset vendimmarrëse.

Në Gjilan po shtohen zërat kritikë që vlerësojnë se udhëheqja komunale ka dështuar të tregojë autonomi dhe profesionalizëm në vendimmarrje.

Sipas këtyre vlerësimeve, kryetari perceptohet si figurë formale, pa ndikim real në drejtimin e proceseve kyçe, ndërsa gjatë viteve të mandatit të tij është vërejtur mungesë e qartë kompetence, vizioni dhe menaxhimi efektiv të projekteve zhvillimore.

Nga ana tjetër, opozita në komunë po kritikohet për mungesë koordinimi dhe një rol më pak aktiv në adresimin e çështjeve që prekin qytetarët. Kjo situatë, sipas analistëve lokalë, ka krijuar një boshllëk në debatin politik dhe në mbikëqyrjen e institucioneve.

Në këtë kontekst, pakënaqësia e qytetarëve duket se po rritet, ndërsa kërkesat për transparencë, llogaridhënie dhe realizim konkret të projekteve mbeten në qendër të vëmendjes publike./rajonipress/