Sqarohu Behgjet

Loja e nisur një javë më parë nga Behgjet Pacolli se Mali e ka njohur Kosovën është mbyllur të shtunën. Zyrtarët e shtetit afrikan në New York kanë thënë për Express se vendi i tyre nuk e ka pranuar pavarësinë .

Partitë opozitare akuzuan Qeverinë se po e keqpërdor procesin e njohjeve. E Zëvendëskryeministri i Parë që ndodhet në Afrikë tha se do të kërkojë sqarime nga ky shtet.

Përfundimisht të shtunën është sqaruar se Kosovën nuk e kanë njohur 92 shtete siç ka deklaruar Zëvendëskryeministri i Parë, Behgjet Pacolli.

Zyrtarë të Malit në Kombet e Bashkuara në një përgjigje për Express, përmes postës elektronike kanë thënë se shteti afrikan nuk e ka njohur pavarësinë e Kosovës.

“Duam t’ju njoftojmë se Republika e Malit nuk e ka njohur Kosovën si shtet të pavarur”,

kanë thënë zyrtarë të këtij misioni për Express të shtunën.

Në Mali aktualisht është gjendje grusht shteti, pasi Presidenti i zgjedhur në mënyrë demokratike është rrëzuar nga njeriu që, sipas Pacollit, ka “nënshkruar” notën verbale për njohjen e Kosovës, Dioncounda Traore.

Pacolli të premten ka lëshuar deklarata dhe komunikata për media, duke demantuar lajmin se Mali nuk e ka njohur Kosovën. Madje përmes një njoftimi, zyra e tij ka njoftuar se Pacolli do të udhëtojë në Bamoko për të sqaruar njohjen, të cilën kishte thënë një javë me parë se e ka siguruar falë angazhimit personal.

Por, të shtunën Pacolli dhe zyra e tij janë heshtur. Nuk kanë lëshuar komunikata e as deklarata për të treguar pse po luhet me procesin e njohjeve.

Burime të Express brenda Qeverisë kanë thënë se shtetet që e ndihmojnë procesin e njohjeve janë të irrituara me veprimet e Pacollit, i cili po vazhdon të mos i përfillë procedurat për të publikuar një njohje të re.

Shpërndaje.
© RAJONIPRESS