Spitali i Gjilanit në renovim, kërkohet mirëkuptim nga qytetarët për shkak të reduktimit të përkohshëm të kapaciteteve

Gjilan – Spitali i Përgjithshëm i Gjilanit ka njoftuar qytetarët dhe shfrytëzuesit e shërbimeve shëndetësore se aktualisht institucioni ndodhet në fazën e renovimit të hapësirave kryesore të spitalit.

Sipas menaxhmentit të këtij institucioni, gjatë kësaj periudhe, e cila pritet të zgjasë rreth dy vite, do të ketë reduktim të përkohshëm të kapaciteteve të shërbimeve. Megjithatë, theksohet se personeli profesional do të vazhdojë të jetë maksimalisht i angazhuar për t’u ofruar pacientëve shërbime sa më cilësore.

Nga spitali bëhet e ditur se aktualisht ekziston një mbështetje e vazhdueshme nga Ministria e Shëndetësisë e Kosovës dhe Shërbimi Spitalor Klinik Universitar i Kosovës për realizimin e projekteve zhvillimore dhe përmbushjen e objektivave institucionale.

Menaxhmenti i spitalit ka kërkuar mirëkuptimin e qytetarëve edhe për shkak të mungesës së disa profileve të profesionistëve shëndetësorë, duke bërë të ditur se janë në proces për zgjidhjen e shpejtë të këtij problemi.

Në të njëjtën kohë, qytetarët janë siguruar se në rast të paraqitjes së pakënaqësive ndaj personelit shëndetësor, institucionet përkatëse do të ndërmarrin masat e nevojshme sipas rregulloreve dhe ligjeve në fuqi./rajonipress/