Spahiu: Asnjë vizitë e qeveritarëve në Uashington, kjo është shqetësuese

Ish-ambasadori i Kosovës në SHBA, Avni Spahiu, ka thënë se është shqetësuese mungesa e vizitave të nivelit të lartë të Qeverisë së Kosovës në Uashington, në veçanti në Departamentin e Shtetit dhe në Shtëpinë e Bardhë.

“Duhet të bëjmë përpjekje për ta kthyer pozicionin tonë te Amerika… Ne nuk kemi pasur një vizitë të rëndësishme substanciale në Uashington mes Qeverisë sonë dhe SHBA-së në Departamentin e Shtetit apo në nivele të tjera, dhe kjo është pak për t’u shqetësuar”, ka deklaruar Spahiu në emisionin FIVE në RTV Dukagjni.

Ai ka përmendur vizitën e ministrit të Mbrojtjes, Ejup Maqedonci, në Pentagon dhe në forume të rëndësishme në SHBA, si një zhvillim pozitiv.

Sipas tij vizita e Maqedoncit atje dëshmon se bashkëpunimi ushtarak ndërmjet Kosovës dhe SHBA-së mbetet i fortë dhe i pandikuar nga zhvillimet politike.

Megjithatë ai ka theksuar se ndonëse bashkëpunimi ushtarak mbetet i fuqishëm, Kosova duhet të punojë më shumë për t’u rikthyer në vëmendjen e diplomacisë amerikane.

“Është shumë e pozitive që ministri i Mbrojtjes është pritur në Pentagon dhe takimet e tij me shumë gjeneralë dhe personalitete ushtarake e të sigurisë në Uashington dëshmojnë mbështetjen e pakursyer të SHBA-së për Kosovën në aspektin e bashkëpunimit ushtarak. Por në aspektin politik, do të duhej të bëjmë përpjekje që të jemi përfundimisht në Departamentin e Shtetit apo në Shtëpinë e Bardhë – arrihet shumë më vështirë, por është e domosdoshme të jemi aty në forume ndërkombëtare”, ka theksuar Spahiu. /Dukagjini/