Sokol Haliti për William Walker: Kontributi i tij mbetet i paharruar dhe thellësisht i çmuar për popullin e Kosovës

Viti – Sot patëm nderin dhe kënaqësinë e veçantë të mirëpresim Ambasadorin e Paqes, z. William Walker, Qytetar Nderi i Komunës së Vitisë, me respekt të veçantë në këtë vizitë domethënëse, e cila e vendosi edhe një herë në qendër vlerat tona: kujtesën historike, identitetin kulturor dhe krenarinë qytetare.

Gjatë qëndrimit të tij, Ambasadori Walker u prit në dy lokalitete me rëndësi të jashtëzakonshme për komunën tonë. Vizita nisi në Stubëll, në vendin e Shkollës së Parë Shqipe në Kosovë, vatër e arsimit dhe e ndërgjegjes kombëtare.

Më pas, ai vizitoi Letnicën, konkretisht Kishën e Zojës së Letnicës, vendin ku Nëna Terezë mori vendimin e saj të shenjtë për t’iu përgjigjur thirrjes në misionin e saj human dhe shpirtëror.

Në fjalën time të rastit, e përshëndeta Ambasadorin Walker dhe e falënderova sinqerisht për kontributin e tij të jashtëzakonshëm në zbardhjen e së vërtetës mbi masakrën gjenocidale të Reçakut, një ngjarje që tronditi botën dhe u bë pikë kthese për drejtësinë dhe ndërgjegjen ndërkombëtare.

Kontributi i tij mbetet i paharruar dhe thellësisht i çmuar për popullin e Kosovës. Ne, si Komunë e Vitisë, jemi krenarë që e mirëpresim dhe e nderojmë një mik të së vërtetës dhe të lirisë, duke e ruajtur me dinjitet këtë trashëgimi dhe duke e përcjellë si mesazh për brezat që vijnë ka thwnw Haliti./rajonipress/