Sokol Haliti nderohet me mirënjohje nga senatori i Nju-Jorkut, Kevin S. Parker

Viti – Kryetari i Komunës së Vitisë, Sokol Haliti, është nderuar me certifikatë mirënjohjeje dhe proklamatë nderimi nga senatori i shtetit të Nju-Jorkut, Kevin S. Parker.

Vlerësimi u bë në kuadër të ceremonisë “Humanitarian Platinum Leadership Awards 2026”, e cila u mbajt më 9 tetor 2026 në selinë e Kombeve të Bashkuara në Nju-Jork.

Sipas njoftimit, mirënjohjet i janë ndarë Halitit për angazhimin në promovimin e lidershipit rinor, ndërtimin e paqes dhe zhvillimin e qëndrueshëm. Ato vlerësojnë gjithashtu mbështetjen dhe kontributin e tij në organizimin e Samitit Botëror të të Rinjve për Paqe dhe të Ardhme të Qëndrueshme, i cili u mbajt këtë vit në Viti.

Me këtë rast, Haliti ka falënderuar senatorin Kevin S. Parker për vlerësimin, si dhe Institutin për Kërkime në Politika Publike dhe Diplomaci (IPPDR), të drejtuar nga Dr. Andrise Bass, për bashkëpunimin dhe partneritetin në realizimin e nismave të përbashkëta.

Sipas njoftimit, këto iniciativa synojnë promovimin e paqes, fuqizimin e të rinjve dhe mbështetjen e zhvillimit të qëndrueshëm./rajonipress/