S’ka liberalizim të vizave këtë vit, thonë ekspertët e integrimeve

Njohësit e procesit të integrimeve evropiane janë skeptikë se liberalizimi i vizave për kosovarët do të ndodhë gjatë vitit 2015. Ata kritikojnë drejtuesit e shtetit që me lehtësi të madhe japin afate për fundin e këtij procesi, shkruan sot Koha Ditore.

Ishte kryeministri Isa Mustafa ai i cili në fillim të mandatit kishte deklaruar se fillimi i vitit 2015 do të jetë koha kur qytetarët e Kosovës do të lëviznin pa viza në zonën e Schengenit.

Edhe pse ky proces, sipas Mustafës, varet edhe nga angazhimi dhe dinamika në zbatimin e kritereve të mbetura, 2015-ta do të shënojë fundin e gjithë procesit.

“Dialogu për liberalizimin e vizave me Bashkimin Evropian është prioritet i Qeverisë së Republikës së Kosovës dhe viti 2015 mbetet vit i përfundimit të këtij procesi”, ka thënë ai në fjalimin e mbajtur në fillim të këtij takimi, prej të cilit pas përfundimit të fjalës së Mustafës përfaqësuesit e medieve janë larguar.

Por derisa ikja e qytetarëve të Kosovës në mënyrë ilegale të vazhdojë, të mos bëhet riatdhesimi i tyre dhe të mos plotësohen të gjitha kriteret BE-së për liberalizim, sipas njohësve të integrimeve evropiane, kosovarët nuk do të mund të lëvizin pa viza. Njëri nga ta, Shenoll Muharremi, ka thënë se nuk ka gjasa që liberalizimi të ndodhë më 2015.