S’ka integrim pa Demarkacion

Përfaqësuesit e Bashkimit Evropian dhe ata të NATO-s, ritheksojnë edhe një herë se Demarkacioni me Malin e Zi mbetet kusht për rrugën integruese të Kosovës, përfshirë këtu edhe liberalizmin e vizave.

Këto qëndrime u dhanë dje në Prishtinë në Seminarin e 93-të të Asamblesë Parlamentare të NATO-s e cila po mbahet për herë të parë në Kosovë.

Natalya Apostolov, shefe e Zyrës së Bashkimit Evropian në Kosovë tha se BE-ja nuk është duke shpikur kushte vetëm që ta largojë Kosovën nga liberalizmi.

Duke iu përgjigjur pyetjeve të deputetëve të opozitës, Apostolov ka treguar se BE-ja nga praktikat e mëhershme gjatë procesit të zgjerimit ka shtuar kriteret.

Për Demarkacionin ka thënë se është parashutuar si problem teknik i cili ka mundur të zgjidhet shumë lehtë, por që është politizuar dhe se tash është bërë një pengesë kryesore për vizat, shkruan sota Gazeta “Zëri”.

“Edhe një herë duhet t’ju siguroj se ne nuk jemi duke shpikur kushte për ta mbajtur Kosovën larg familjes evropiane. BE-ja gjatë zgjerimit ka kaluar shumë sfida, ndaj kemi nxjerrë mësime. Për këtë shkak kemi menduar ta përfshijmë këtë kushtëzim që është diçka lehtë e zgjidhshme. Fatkeqësisht, ky problem është politizuar dhe paraqitet si një prej pengesave të cilat i shohim në rrugën e Kosovës”, ka thënë Apostolova.

Ndërkaq Kryetari i Kuvendit të Kosovës, Kadri Veseli, ka thënë se Bashkimi Evropian duhet të ketë qasje më integruese për Kosovën, sepse s’ka përse të mbetet e izoluar, ndryshe nga vendet tjera të Ballkanit. “Kosova nuk e meriton që të jetë ishull i izoluar në mes të Evropës. Nuk jemi më keq se vendet fqinje”, ka thënë Veseli duke folur në Seminarin Rose Roth./zeri/