Sinan Vllasaliu: 20 vera në Ulqin

Këngëtari Sinan Vllasaliu është ndër më të popullarizuarit, por kur vjen puna tek prezenca në mediat e shkruara, është ndër ata që më së paku përfolen .

30 vitet e karrierës e bëjnë Vllasaliun shumë pak të konkurrueshëm në tregun e muzikës popullore shqiptare.
Shtëpitë e tij që gjenden në vende turistike (nga Brezovica malore deri tek Shëngjini bregdetar), por edhe në Nju Jorkun e largët, të bëjnë të pyesësh veten nëse fama e tij mes shqiptareve ecën në përpjesëtim të drejtë me vlerën në treg apo aftësinë e këngëtarëve.

“Gjatë 20 viteve të fundit gjatë verës kam qenë në Ulqin ku këndoj çdo mbrëmje”, shprehet Sinani për TCh.

Ai tregon edhe arsyen pse nuk e pëlqen pjesëmarrjen në festivale të ndryshme: “Festivalet janë bërë shumë private dhe nuk është më real kur personalizohet. Nëse unë bëj një festival dhe caktoj jurinë, ata do të ndikohen nga mua dhe nuk ka më kuptim festivali.”

Mënyra e jetesës që Vllasaliu ka zgjedhur, që të mbaj private jetën e tij, ka rezultuar si mjaft e suksesshme deri tani. Ai nuk kupton disa nga kolegët e tij: “Nuk arrij ta kuptoj se pse duhet të bësh gjithçka për të dalë në faqet e para të gazetave.”