Shumë lëndë pushojnë në sirtarë

Gjilan – Kryetari i Gjykatës Komunale të Kamenicës, Zijadin Spahiu, ka thënë se edhe përkundër angazhimit të madh të gjyqtarëve dhe personelit të këtij institucioni, numri i lëndëve të pazgjidhura këtë fillimvit vazhdon të jetë i lartë.

Spahiu njoftoi se janë 2 mijë e 310 lëndë në sirtarët e Gjykatës, që po presin përgjigje.

“Në tremujorin e parë të 2012, kemi pranuar 403 lëndë, derisa kemi zgjidhur 411, një pjesë të trashëguara nga vitet paraprake. Kemi pasur një numër të madh të konfirmimit të aktakuzave, lëndë trashëgimore, përmbarime të vendimeve, ekzekutime të lëndëve penale etj.”, ka thënë Spahiu.

Sipas tij, shumë shpejtë do të angazhohen edhe dy gjyqtarë, në mënyrë që të shtohet efikasiteti dhe dinamika e punës në këtë Gjykatë.
“Një ndër problemet kryesore që po na përcjell vit pas viti, është numri i vogël i gjyqtarëve, aktualisht me kryetarin e Gjykatës, punojnë vetëm tre gjyqtarë”, është shprehur Spahiu.

Ai ka premtuar, se deri sa të jetë në krye të këtij organi, transparenca nuk do të mungoj, konform ligjit mbi dokumentet zyrtare./radiopremiera/rajonipress/