Shqiptarja, doktorantja më e dalluar e Universitetit të Jena-s

Vjosa Bilalli doktorante shqiptare nga Kosova, ka marrë çmimin DAAD-Preis 2012 të Universitetit gjerman në Jena

Vjosa është lindur në Kosovë. Ajo, një studente e angazhuar në jetën shoqërore dhe në ofrimin e ndihmave humanitare, thotë se në rininë e hershme kishte pasur edhe vetë nevojë për ndihmë dhe kishte pranuar ndihma. Kështu e arsyeton ajo angazhimin e saj të sotëm për të ndihmuar të tjerët.

Doktorantja, sot 25 vjeçe e universtetit Friedrich-Schiller Jena, ka qenë anëtare e bordit të një organizate ndërkombëtare në Prishtinë që angazhohej për arsimim dhe mirëkuptim në mes të popujve në Kosovë.

Ajo ka qenë bashkëthemeluese e organizatës humanitare “Were safe”, e cila informon studentët konkurrues nga Shqipëria, Kosova dhe Rumania mbi shumëllojshmërinë e studimeve në Jena dhe i mbështet ata konkretisht në konkurrimin për tu pranuar në studime.

Si tutore e gjuhës shqipe në Institutin për Sllavistikë, kjo studente e shkëlqyeshme promovon në mënyrë aktive këmbimin ndërkulturor në mes të gjermanëve dhe shqiptarëve. Interesimi i saj privat për pikturë shprehet në projektet në të cilat ajo, të rinjtë dhe fëmijët i orienton në botën e artit, shkruan portali juraforum.de.

Për rezultatet e saj të shkëlqyera në studime dhe për angazhimin e saj të jashtëzakonshëm shoqëror në lëmin ndërkulturor, Vjosa Bilalli vlerësohet m çmimin e DAAD (Shërbimi Gjerman i Shkëmbimit Akademik) për studentin e dalluar të huaj të Universitetit Friedrich-Schiller Jena të vitit 2012. Çmimi që ka edhe vlerën monetare prej 1000 eurosh do t`i ndahet asaj nga rektori i universitetit në kuadrin e solemnitetit të diplomimit që mbahet më 25 tetor.

Vjosa Bilalli kishte diplomuar në semestrin dimëror 2007-2008 në Universitetin e Jena-s si studente mysafire nga universiteti i binjakëzuar i Prishtinës. Në vitin pasues ajo qe kthyer sërish në Jena për të punuar masterin me temën “Historia dhe politika e shekullit 20”. Këtë studim ajo e kishte mbaruar me sukses të shkëlqyeshëm në vitin 2011 si njëra ndër më të mirat në gjeneratën e saj.

Që nga semestri dimëror 2011-2012 Bilalli ka punuar në temen e doktoratës “Përvoja shqiptare me komunizmin: Kujtimi dhe konstruksioni i kujtesës”. Për të punuar këtë temë ajo ka bërë intervista me dëshmitarë të kohës në Shqipëri. Shqiptarja e angazhuar, e cila e flet gjermanishten në mënyrë të përsosur, ka qenë disa herë bursiste e DAAD ndërsa në vitin 2009 edhe e një programi ndërkombëtar parlamentar të Bundestagut gjerman.

Pak kohë më parë asaj i është besuar edhe një bursë doktorimi nga DFG me temën “Orientimet kulturore dhe strukturat shoqerore të rendit në Evropën Jugliondore”. “Me të gjitha këto merita, ajo bën pjesë në mesin e doktorantëve më të mirë të Universitetit të Jena-s”, thekson dr. Jürgen Hendrich nga zyra ndërkombëtare e universitetit.

“Jam shumë e emocionuar”, ky është reagimi i parë i Vjosës, pasi ka kuptuar se do të marrë çmimin. Ajo e sheh këtë çmim si vërtetim për punën e saj të bërë dhe shpreson se “ky çmim do t`i inkurajojë edhe studentët tjerë të huaj që të angazhohen po kështu”. Ajo vetë ka një synim të qartë jetësor: pas doktorimit, dëshiron që të themelojë në Jena një organizatë humanitare e cila do të ndihmojë gratë e diskriminuara për të fituar një perspektivë profesionale dhe private.

Ndërsa me paratë e çmimit “DAAD”, doktorantja atraktive do të mbështesë familjet nevojtare në Kosovë, atje kua ajo vetë pati marrë ndihma.(albinfo.ch)