Shqiptari Patrick Nuo futet në xhungël të Australisë

Artisti shqiptaro-zviceran edhe zyrtarisht bëhet pjesë e spektaklit: „Ich bin ein Star – holt mich hier raus!“ duke pranuar të braktisë familjen për t’i hyrë garës për t’u bërë „mbret i xhunglës“ në mesin e 11 artistëve në spektaklin gjerman që do të mbahet nga e premtja në malet e Australisë.

Pas spektaklit televiziv “Deutschland sucht den Superstar” (Gjermania kërkon një yll) 2011, ku ishte pjesë e jurisë së këtij spektakli, krahas Diter Bohlen-it dhe Fernanda Brandao-s, shqiptaro-zviceranin Patrick Nuo do ta shohim prej 11 janarit në një shou tjetër televiziv në Gjermani.

Bëhet fjalë për emisionin shumë të shikuar në Gjermani „Ich bin ein Star – holt mich hier raus!“. Në edicionin e shtatë të këtij spektakli janë paraqitur edhe modelja Fiona Erdmann dhe finalistja e “American Idol”, Juliette Schoppmann. Për 30-vjeçarin Patrick Nuo xhungla është një rast i mirë për një rikthim para një audience të madhe.

Spektakli gjerman “Ich bin ein Star – holt mich hier raus!“ do të fillojë më 11 janar. Patrick Nuo është këngëtar i lindur në Zvicër dhe aktualisht jeton në Gjermani. Është pjesë e skenës muzikore që prej vitit 2003 dhe kultivon zhanrin pop-rock në gjuhën angleze. Ka publikuar 3 albume: Welcome (2003), Superglue (2005) e Nuo (2007). Mes këngëve më të njohura figurojnë ‘5 Days’ (2003), ‘Welcome’ (to My Little Island) (2003). Nuo ka lindur në Gettnau, në kantonin e Lucernit në Zvicër, nga një baba shqiptar dhe nënë zvicerane. Në moshën 14-vjeçare transferohet në Hamburg të Gjermanisë, ku ka ndërtuar karrierën muzikore. Është martuar më 2005 me aktoren amerikane Molly Schade, me të cilën ka dy fëmijë.(albinfo)