Shqiptari nuk pranon asgjë më pak se 43 milionë euro!

Odisejada e këtij “fitimi” po vazhdon tash një vit, ndërsa procesi për të është nisur për së dyti në një gjykatë austriake

Behar Merlaku nga Dietikoni i Cyrihut, në mars të vitit 2011 kishte provuar fatin në një automat bixhozi në një kazino të Bregenzit, Austri. Ajo që i kishin parë sytë në ekranin e automatit kishte qenë diçka e pabesueshme: i kishte rënë xhekpoti me shifrën 43 milionë euro!

Por, kur Behari shkon të marrë fitimin, i dalin pengesat përpara.

Përgjegjësit i thonë se bëhej fjalë për një defekt teknik të automatit dhe se në kushte normale në atë automat nuk mund të fitohen më shumë se 4500 euro. Por shqiptari nga Zvicra nuk dorëzohet.

Ai merr avokat dhe me ndihmën e tij padit kazinonë. Odisejada e këtij “fitimi” po vazhdon tash një vit, ndërsa procesi për të është nisur për së dyti në një gjykatë austriake.

Të dyja palët po këmbëngulin në të drejtën e tyre ndërkohë që janë duke u zhvilluar bisedime për një pajtim në mes tyre para rifillimit të procesit. Avokatët nuk kanë dashur të japin ndonjë koment lidhur me shumën e kërkuar respektivisht të ofruar të zhdëmtimit.

Në muajin janar, kazinoja i kishte ofruar atij 500 mijë euro si kompromis, por Behari nuk e kishte pranuar.