Shqiptarët, të tretët në listë për kërkim azili

Gjatë marsit më së shumti azilkërkues kanë ardhur nga Siria (1786), pastaj nga Serbia (1386), nga Shqipëria (710). Nga Kosova kanë kërkuar azil 385 persona

Numri i personave që kanë kërkuar azil në Gjermani gjatë muajit mars ka shënuar një rritje shumë të madhe në krahasim me muajin njëjtë të vitit 2013. Kështu, në marsin e këtij viti zyrave të azilit të Gjermanisë ia kanë mësyrë 11.280 veta që është për 79.2 për qind më shumë se në marsin e një viti më parë.

Por, siç bën të ditur Enti Federal për Migracion, përmes një komunikate për shtyp, ky numër po u krahasua me atë të muajit shkurt shënon një rritje të papërfillshme, rreth 0.5%. Ndërkaq, në tre muajt e parë të këtij viti rritja e numrit të azilkërkuesve ka qenë për 75.7 për qind në krahasim me tremujorin e një viti më parë, duke mbërritur në shifrën e përgjithshme 37.820.

Gjatë marsit më së shumti azilkërkues kanë ardhur nga Siria (1786), pastaj nga Serbia (1386), nga Shqipëria (710), nga Maqedonia (574) etj. Është simptomatike rritja e numrit të azilkërkuesve nga Shqipëria. Ata, në statistikat e mëhershme nuk kanë figuruar në kreun e listave, ndërsa gjatë shkurtit (me 833) dhe marsit zënë vendin e tretë, menjëherë pas Sirisë dhe Serbisë.

Azilkërkuesit nga Kosova në këtë statistikë janë në vendin e nëntë. Gjatë marsit është shënuar një rënie e konsiderueshme e numrit të kosovarëve që kanë kërkuar azil në Gjermani. Kështu, në janar ishin 555, në shkurt 440 dhe në mars 382./albinfo.ch/