RCCOLA

Shqiptarët myslimanë dhe të krishterë

/ 3 minuta lexim
RCCOLA

Nga Shefik Sadiku – 1. Aq pak janë shqiptarët myslimanë dhe ata të krishterë në hartën globale të islamizmit dhe krishterimit, sa që as nuk mund ta mbrojnë islamin, as ta mundin krishterimin dhe anasjelltas, prandaj edhe islamizmi edhe krishterizmi global aq komod janë pa shqiptarët sa që nuk merret vesh prania apo mungesa e tyre.

Uji Dea
  1. Jo vetëm që janë të pamundshme, por janë tepër të rrezikshme, për qenien tonë kombëtare, tendencat e aty-këtushme të qarqeve apo individëve të caktuar për t’ i bërë gjithë shqiptarët të një besimi fetar: myslimanë apo të krishterë.
    Rrethanat historike kanë determinuar këtë përbërje fetare të shqiptarëve, prandaj tendencat për ta ndryshuar apo rishkruar historinë tonë në këtë drejtim janë vetëm antishqiptare, në dobi të armiqve tanë.
  2. Qarqet ultra ekstreme të nxitura apo të ideuara nga armiqtë tanë , gjoja se shqiptarët, si shumicë myslimane, diskriminohen dhe anatemohen krahasuar me pakicën shqiptare krishtere, jo vetëm që s’janë të vërteta, por janë të papranueshme. Për harmoninë e shkëlqyeshme fetare brenda shqiptare, përgjegjësinë më të madhe duhet ta mbajë shumica myslimane.
  3. Qarqet ultra ekstreme, të thirrura, gjoja në mbrojtjen e krishterizmit se shqiptarët e krishterë si pakicë fetare, karshi shqiptarëve myslimanë si shumicë, janë të diskriminuar, janë jo vetëm të pavërteta, por janë tendencioze dhe të stisura. Asnjë dyshim, asnjë fobi dhe asnjë urrejtje nuk kanë shumica absolute myslimane shqiptare ndaj sivëllezërve të tyre të besimit krishter, si pakicë.
  4. Liria e të drejtës së besimit është liri e garantuar me Kushtetutë dhe ligje të tjera, prandaj të dy ekstremizmat, hipotetikisht, të dy besimeve duhet ta kuptojnë se Shteti ynë në këtë drejtim është shtet sekular që garanton besimin e çdo qytetari.
  5. Bashkësia Islame e Kosovës, Ipeshkëvia e Kosovës, bota intelektuale, mediat, partitë politike, OJQ-të, institucionet arsimore dhe organizatat e ndryshme duhet të mos kenë kompromis në luftë kundër rrymave dhe qarqeve ekstremiste brenda të të dyja besimeve.
  6. Ne kemi Kosovën tonë të lirë, kemi shqiptarinë për mbrojtjen e së cilës kanë obligim moral, kombëtar e institucionalë gjithë shqiptarët, ata që kryejnë namaze e ata që ndjekin mesha, minaretë e xhamive dhe kumbonaret e kishave, hoxhallarët e priftërinjtë, besimtarët dhe pabesimtarët; shqiptarinë do ta mbrojnë shqiptarët ,askush tjetër.
  7. Kosova, Shqipëria dhe gjithë Shqiptaria është e kaluara, e tashmja dhe e ardhmja jonë e përbashkët, është amaneti i të rënëve për këto troje, është ylli drejt të cilit hapërojnë gjithë shqiptarët.
  8. Secili është i lirë të zgjedh si dhe çka të besojë, por ama, të gjithë kemi detyrim të punojmë dhe ta mbrojmë Shqiptarinë pa e dëmtuar askë.