UBT

Shqipëria, “Medalje të Mirënjohjes“ për gazetarin zviceran Pierre-Marcel Favre

/ 2 minuta lexim

“Për kontributin e tij në botimin e librave historikë e politikë në gjuhën frënge, duke mundësuar njohjen në plan ndërkombëtar të realitetit shqiptar nën regjimin e diktaturës komuniste”.

Presidenti i Shqipërisë, Bujar Nishani, ka nderuar botuesin, kritikun dhe gazetarin e njohur franko-zviceran, Pierre-Marcel Favre, njëkohësisht edhe themelues dhe President Nderit i Panairit Ndërkombëtar të Librit në Gjenevë, me “Medaljen e Mirënjohjes”, me motivacionin: “Për kontributin e tij në botimin e librave historikë e politikë në gjuhën frënge, duke mundësuar njohjen në plan ndërkombëtar të realitetit shqiptar nën regjimin e diktaturës komuniste”, bëhet e ditur në një njoftim nga zyra e presidentit shqiptar në Tiranë.

Uji Dea

Në këtë ceremoni në Tiranë ishin të pranishëm ministri i Punëve të Jashtme, Edmond Panariti, ministri për Inovacion, Teknologjinë e Informacionit dhe Komunikimin, Genc Pollo, konsulli i Shqipërisë në Selanik, Riza Poda, drejtoresha e Arkivit Qendror të Shtetit, Nevila Nika, si dhe një sërë personalitetesh të tjera publike.

Presidenti i Shqipërisë i dorëzoi „Medaljen e Mirënjohjes“ mysafirit nga Zvicra, Pierre-Marcel Favre, duke vlerësuar lart veprimtarinë e tij, përkushtimin dhe kontributin e madh në fushën e botimeve, të kritikës dhe veprimtarisë gazetareske. Në fjalën e tij Favre vuri në dukje se Zvicra dhe Shqipëria kanë shumë pika të përbashkëta e shumë ngjashmëri mes tyre, sa u përket territoreve të vogla të të dy vendeve dhe flamujve respektivë që përmbajnë ngjyrën e kuqe. “Jam sërish në Tiranë dhe më ka bërë jashtëzakonisht përshtypje ndryshimi dhe zhvillimi juaj ekonomik. Shqiptarët kanë meritë në ndërtimin dhe transformimin e vendit të tyre. Ju po më jepni një shpërblim jashtëzakonisht të madh. Është absolutisht e papritur dhe e mrekullueshme. Dëshiroj t’ju falënderoj përzemërsisht! Sigurisht që mund të mbështeteni tek unë për të mbrojtur imazhin e Shqipërisë së re”, ka thënë botuesi Pierre-Marcel.(albinfo)