Shqetësim dhe tronditje në Gjilan: Dy zyrtarë policorë nën dyshimin për keqpërdorim të detyrës, qytetarët kërkojnë përgjegjësi

Gjilan – Qytetarë të Gjilanit shprehin shqetësim pas dyshimeve për sjellje të kundërligjshme të dy zyrtarëve policorë, ndaj të cilëve Inspektorati Policor i Kosovës ka rekomanduar suspendimin. Rasti ngre pikëpyetje për besimin e qytetarëve në institucionin që ka për detyrë t’i mbrojë ata.

Dy zyrtarë policorë të Stacionit Policor në Gjilan janë rekomanduar për suspendim nga Inspektorati Policor i Kosovës (IPK), nën dyshimin për kryerjen e veprës penale “Keqpërdorimi i pozitës apo autoritetit zyrtar”.

Sipas njoftimit të IPK-së, rasti ka ndodhur më 15 tetor 2026, rreth orës 23:00, në Gjilan, kur dy zyrtarët policorë dyshohet se kanë ndaluar një qytetar dhe e kanë futur në veturën zyrtare.

Sipas të dhënave fillestare të hetimit, ndaj qytetarit pretendohet se është ushtruar abuzim verbal dhe i është cenuar privatësia, përfshirë marrjen e telefonit të tij pa urdhër të Prokurorit të Shtetit.

Dyshimet marrin një dimension tjetër për shkak se, sipas IPK-së, veprimet e pretenduara mund të kenë lidhje me një ankesë të paraqitur nga i njëjti qytetar në korrik të vitit 2026, ndaj zyrtarëve policorë në fjalë, nën dyshimin për keqtrajtim dhe tejkalim të autorizimeve policore.

Lajmi ka nxitur shqetësim te qytetarët, të cilët vlerësojnë se çdo dyshim për keqpërdorim të uniformës dhe autoritetit policor duhet të trajtohet me seriozitet, transparencë dhe përgjegjësi institucionale.

Menduhi, një qytetar nga Gjilani, thotë se raste të tilla krijojnë dilema dhe dyshime edhe për funksionimin e pjesës tjetër të Policisë së Kosovës, e cila kryen detyrën e saj në shërbim të qytetarëve.

“Kur dëgjon për raste të tilla, natyrshëm lindin dilema dhe dyshime. Policia duhet të jetë institucioni ku qytetari ndihet i sigurt, jo vendi nga i cili mund të frikësohet. Ata që vërtetojnë se kanë keqpërdorur detyrën duhet të mbajnë përgjegjësi dhe të mos fshihen pas uniformës”, shprehet ai.

Edhe Reshati, një tjetër qytetar nga Gjilani, thotë se lajmi e ka tronditur, veçanërisht për shkak të besimit që qytetarët kanë te pjesëtarët e Policisë.

“Si është e mundur që pjesëtarë të policisë të jenë të përfshirë në raste të tilla, kur ne ua kemi besuar jetët tona dhe familjet tona? Vërtet shokuese”, thotë Reshati.

Sipas qytetarëve, raste të tilla duhet të hetohen deri në fund dhe, nëse vërtetohen shkeljet, përgjegjësit duhet të përballen me pasojat ligjore. Ata theksojnë se përgjegjësia individuale është e domosdoshme për të mos cenuar besimin në të gjithë institucionin policor.

Ndërkaq, Inspektorati Policor i Kosovës ka bërë të ditur se mbetet i përkushtuar në hetimin e dyshimeve për veprime të kundërligjshme nga zyrtarët policorë, me synimin e garantimit të llogaridhënies dhe forcimit të integritetit policor.

Hetimet për rastin janë në zhvillim. Deri në përfundimin e tyre dhe një vendimi përfundimtar nga organet kompetente, dy zyrtarët duhet të trajtohen në përputhje me parimin e prezumimit të pafajësisë.

Njoftimi i Inspektoratit Policor të Kosovës

IPK ka rekomanduar suspendimin e dy zyrtarëve policorë të Stacionit Policor në Gjilan, të Drejtorisë Rajonale të Policisë në Gjilan, nën dyshimin për kryerjen e veprës penale “Keqpërdorimi i pozitës apo autoritetit zyrtar”.

Sipas të dhënave fillestare të hetimit, më 15 tetor 2026 rreth orës 23:00 në Gjilan, zyrtarët policorë dyshohet se kanë ndaluar një qytetar dhe e kanë futur në veturën zyrtare, ku pretendohet se ndaj tij është ushtruar abuzim verbal dhe i është cenuar privatësia, përfshirë marrjen e telefonit të tij pa urdhër të Prokurorit të Shtetit.

Dyshimet fillestare sugjerojnë se veprimet e pretenduara mund të kenë ndërlidhje me një ankesë të parashtruar nga i njëjti qytetar në korrik të vitit 2026, ndaj zyrtarëve policorë në fjalë nën dyshimin për keqtrajtim dhe tejkalim të autorizimeve policore.

Inspektorati Policor i Kosovës mbetet i përkushtuar në ushtrimin e mandatit ligjor për hetimin e dyshimeve për veprime të kundërligjshme nga zyrtarët policorë, me qëllim të garantimit të llogaridhënies dhe fuqizimit të integritetit policor./rajonipress/