Shoqëria civile: Gjyqësori, fajtor për nivelin e lartë të korrupsionit

Prokuroritë dhe gjykatat në Kosovës janë ndër fajtorët kryesorë për nivelin e lartë të korrupsionit në Kosovës, konsiderojnë përfaqësuesit e organizatave joqeveritare në Prishtinë.

Në sistemin e drejtësisë janë personat kompetentë të cilët mund të bëjnë hetime dhe gjykime, gjë që sipas shoqërisë civile, dukuria e korrupsionit mund të bie.

Merita Mustafa, menaxhere e programit Transparenca dhe Anti-Korrupsioni në Institutin Demokratik të Kosovës, thotë se prezenca e lartë e korrupsionit në institucionet e Kosovës, bën që vendi të ngecë në zhvillimin e tij.

“Sa i takon prokurorisë dhe gjyqësorit, ne lirisht aty mund ta hedhim 100 për qind fajin, sepse janë njerëzit kompetentë dhe i kanë të gjitha mundësitë që të bëjnë hetime dhe gjykime të korrupsionit”, thotë Mustafa për REL. “Pse nuk janë ata aktivë, kjo lidhet më shumë me guximin e tyre. Gjithsesi që është edhe një pengesë siguria e tyre. Mirëpo, nëse kanë vullnet duhet t’i kërkojnë kushtet dhe të jenë me të zëshëm, sidomos organet kompetent të cilat janë të thirrura për t’i mbikëqyrur gjykatat dhe prokuroritë dhe t’ju sigurojnë kushtet elementare për funksionimin e duhur”.

Mustafa thekson se si gjyqtarët, po ashtu edhe prokurorët, duhet ta kenë si çështje kryesore luftimin e korrupsionit. Në këtë drejtim, shprehet ajo, duhet të ketë një vendosmëri më të madhe dhe të dënohen personat të cilët gjenden fajtorë.

“Mos guximi vjen nga fuqia e tepërt e politikanëve tanë, me të cilët tashmë jemi mësuar. Ata ndihen inferiorë karshi politikanëve, sepse klasa politike në Kosovë është mjaft e fuqishme dhe për këtë arsye gjyqtarët dhe prokurorët hezitojnë në. Mirëpo, gjithashtu është e lidhur edhe me emërimet që bëhen në këto institucione, ku edhe politika i përzien duart”, tha Mustafa.

Avni Zogiani, nga organizata joqeveritare “Çohu”, i thënë Radios Evropa e Lirë se janë disa faktorë të cilët ndikojnë në mos arritjen e rezultateve në luftimin e korrupsionit. Ai thotë se një ndër faktorët është mungesa e vullnetit politik.

“Ne mund të marrim arsyetime nga më të ndryshmet, nga pagat e vogla e deri të frika, por unë mendoj që baza e problemit është pikërisht në mungesën e vullnetit politik për ta gjetur se ku në të vërtet janë faktorët kryesorë që ndikojnë në mos veprimin e gjyqësorit”, tha Zogiani.

Derisa Mustafa thotë se në ketë drejtim Agjencia Kundër Korrupsionit me kompetencat që ka nuk mund të bëjë më tepër në këtë drejtim, Zogiani fajëson ketë agjenci për mos angazhim të duhur.

Sipas organizatës ndërkombëtare Transparency International, sektori më i korruptuar në Kosovë del të jetë gjyqësia, e cila pasohet nga partitë politike, shërbimet shëndetësore, Kuvendi i Kosovës, bizneset, sistemi arsimor, zyrtarët e institucioneve publike, policia dhe mediat.

Në Kosovë tashmë ekzistojnë disa mekanizma të cilët janë të thirrur për ta luftuar korrupsionin, sikurse Agjencia Kundër Korrupsionit, Task Forca pranë Qeverisë së Kosovës dhe Këshilli Kombëtar kundër korrupsionit pranë Presidencës së Kosovës. /Telegrafi/