Shkon në BQK?

Bedri Hamza ka dhënë dorëheqje nga posti i Ministrit të Financave. Por, zyrtarisht, Kabineti i Kryeministrit ende nuk ka dhënë njoftim zyrtar për daljen e Hamzës nga Qeveria. Kreu i financave duket se synon të bëhet guvernator i Bankës Qendrore.

Në kabinetin e kryeministrit nuk i kanë komentuar këto dorëheqje, ndërsa në Ministrinë e financave e kanë thënë edhe zyrtarisht përmes një komunikate se Bedri Hamza po pret përgjigje nga kryeministri.

“Duke e konsideruar punën në Ministrinë e Financave si përmbyllje të një cikli në karrierën e tij, pas lirimit nga posti i tij z. Hamza synon të kërkojë më tej sfida të reja profesionale. Z. Hamza bën të ditur që arsyet e dorëheqjes së tij janë krejtësisht për motive familjare dhe të karrierës personale”, thuhet në komunikatën e MF’së.

Në letrën e tij të dorëheqjes Hamza shprehet i kënaqur që ka shërbyer në qeverinë Thaçi, si ministër, por edhe gjatë periudhës kur ka shërbyer si zëvendësministër.

Përveç Hamzës, punën në Ministrinë e financave shumë shpejtë do ta lë edhe zëvendësi i tij – Ramadan Avdiu, i cili e ka të siguruar postin e konsullit në ambasadën e Kosovës në Gjenevë të Zvicrës. Ky i fundit po pret derisa t’ia caktojë qeveria një zëvendës.

Zyrtar të këtij institucioni tregojnë se kreu i financave të Kosovës shumë më herët po përgatitej për të marrë postin e guvernatorit të BQK’së dhe me hapjen e konkursit për këtë pozitë i është hapur rruga për të kaluar andej.

“Si ministër s’ka pasur të drejtë me konkurru për guvernator. Patjetër është dashur të japë dorëheqje për të mos e shkelur ligjin. Në bankë e ka të sigurt mandatin pesë vjet, a këtu si kanë mbetur edhe shumë”, thotë një zyrtar i MF’së.

Në Ligjin për BQK-në, thuhet: “Asnjë person nuk do të shërbejë në organet vendimmarrëse të Bankës Qendrore përderisa është anëtar i Kuvendit të Republikës së Kosovës, i Qeverisë, zyrtar i një ministrie të qeverisë ose i ndonjë entiteti publik tjetër, ose zyrtar a punëtor i një institucioni financiar, i cili vepron me zyrat e tij në Kosovë, ose është pronar i drejtpërdrejtë ose pronar aktual i pesë për qind të shumës së interesit të ekuitetit në një institucion financiar të tillë”.

Vetë Hamza nuk e ka bërë publike këtë synim, e as se ku do të shkojë pas lirimit nga posti i ministrit.

Ndërsa zëvendësi i tij, Ramadan Avdiu, tashmë e ka të qartë se kah do t’ia mësyjë, madje

tregon se një veprim të tillë e kishin paraparë në njëfarë forme, ta ndërmerrnin së bashku, pas përmbylljes së vitit 2012.

“Nuk përjashtohet mundësia me kalu në një pozitë të re. Synimet e mia janë në një pozitë diplomatike”, thekson Avdiu.

Megjithatë, ende nuk e ka ofruar zyrtarisht dorëheqjen e tij tek numri një i ekzekutivit.

Ai është emëruar si konsull i përgjithshëm nga Ministria e Punëve të Jashtme në Konsullatën e Gjenevës, ku edhe e ka familjen.

Avdiu edhe kohë më parë kishte paralajmëruar dorëheqjen e tij si nga posti i kryetarit të Degës së Partisë Demokratike në Prishtinë dhe nga pozita e zëvendësministrit.

Megjithatë, ai pohon se nuk do të lë boshllëk në udhëheqjen e Ministrisë së Financave dhe se nuk do t’i lëshojnë njëkohësisht vendet e punës edhe ai edhe ministri.

“Unë do të jem këtu derisa të emërohet ministri i ri. Kam disa obligime që duhet t’i kryej dhe nuk do të lëmë boshllëk në ministri”, është shprehur Avdiu.

Se kush do t’i zëvendësojë krerët e kësaj ministrie ende nuk dihet, ashtu sikur nuk dihet nëse do ta pranojë kryeministri i vendit dorëheqjen e Hamzës.

Karriera e Hamzës

Bedri Hamza u emërua ministër i Financave i Republikës së Kosovës më 22 shkurt 2011. Para se të emërohej në këtë pozitë, për tre vjet Hamza ishte zëvendësministër i Ekonomisë dhe Financave. Para se Partia Demokratike e Kosovës të vinte në pushtet Hamza ka qenë nënkryetar i PDK-së – dega e Mitrovicës; shef i Departamentit për Ekonomi dhe Financa për Qeverisjen e Mirë në Partinë Demokratike të Kosovës, si dhe përgjegjës për përcjelljen e punës së qeverisë së atëhershme. Në periudhën 1987 – 1990, z. Hamza ka punuar në KXMK “Trepça” në Mitrovicë, ku ka ushtruar postin e udhëheqësit të Kontabilitetit dhe Financave në Metalurgjinë e Plumbit. Gjatë viteve 1990 – 1998 ka punuar në biznesin privat. Prej vitit 2000 deri në vitin 2003 ka qenë drejtor i Drejtorisë së Shërbimeve Publike në Kuvendin Komunal të Mitrovicës.