Shkolla e fshatit Haxhaj nuk ka kushte për proces mësimor

Gjilan – Jo larg fshatit Zhegër, në kilometrin e dytë, ngre shtat shkolla fillore, paralele e ndarë e Shkollës fillore “Agim Ramadani” në Zhegër. Kjo shkollë fillore e fshatit Haxhaj e ka një “hall” se nuk ka kushte për proces mësimor. Objekti i shkollës në fjalë është jo i përshtatshëm për t’u zhvilluar procesin normal i mësimit. Aty nga larg duken të qarat e mureve të këtij objekti shkollor, ku edhe shkollarët druajnë nga kjo “gjendje” e kësaj vatre arsimore.

Edhe ish-drejtori i Arsimit, në Gjilan, Nazmi Musa, i cili para do dite shkoi në pension, e ka bërë një projekt për ndërtimin objektit shkollor në fjalë, por, ai projekt, si shton Rrahman Agushi, drejtor shkolle, – ka mbetur edhe sot e asaj dite vetëm në letër e asgjë në praktikë. Por, tash për tash, ky objekt shkollor nuk i plotëson kushte normale për zhvillimin e procesit mësimor, për faktin se objekti shkollor është rrëzbitur tej mase.

Si mësuam nga Rrahman Agushi, drejtor shkolle në Zhegër, kjo shkollë e “ndarë” e fshatit Haxhaj nuk i plotëson kushtet as për afërm për proces mësim normal. “Edhe nga brenda duken muret e plasaritura, por të plasaritura janë edhe pjesa e sipërme të tavanit. Për momentin, ky objekt shkollor do të ishte mirë të renovohet ose të bëhet një zgjidhje më afatgjate në ndërtimin e një shkolle të re. Tash për tash, në këtë shkollë fshati, mësimet e rregullta i vijojnë nga klasa e parë e gjer në klasën e tetë, ku gjithsejtë janë 53 nxënës. Prej këtij numri, 27 janë meshkujt dhe 26 janë femra.

Këtu, tash për tash, në mësim japin mësim 4 mësues klasor dhe 12 arsimtarë. Të shtojmë edhe këtë, shton Rrahman Agushi drejtor, në këtë lokalitet të kësaj ane të Malësisë së Karadakut, mësimet i vijojnë shkollarët nga katër fshatra, si janë: Godeni, Haxhaj, Demiraj dhe fshati Selishtë, komuna e Gjilanit. Sa i përket inventarit shkollor, të them të drejtën, nuk është aq i panevojshëm. Dihet, ka banga e karriga të vjetra, por ato pajisen për pak kohë”.

Siç dihet, shkolla në këtë fshat ka funksionuar nga vitit 1972 në objektin e familjes Fazli D. Haxhës. Personeli mësimor është i rregullt, ku një numër i tyre vijnë nga rrethina e kësaj ane, por disa të tjerë vijnë nga Gjilani. Të shtojmë edhe këtë se, 17 shkollarë të klasave të 12-ta, mësimet e rregullta i vijojnë në shkollën qendër, në Zhegër.

Edhe Hasan Dauti, qytetar nga ky lokalitet, ka vërejtje. Ai shton se, kjo shkollë fshati ka nevojë të ndërtohet e re. “Sot kjo shkollë fshati rënkon nga “dhëmbi” i kohës. Ky objekt nuk i përngjan ndonjë shkolle, sepse, si nga brenda, po ashtu edhe nga jashtë, duket e rrëzbitur dhe jo funksionale për mësim. Prandaj, unë jam që sa nuk është bërë vonë, të bëhet një zgjidhje për shkollarët e këtij lokaliteti. Unë kam bërë ankesë edhe tek organet e komunës sonë, që shkolla në Haxhaj të ndërtohet dhe të jetë një prioritet prej prioriteteve tjera të kësaj fushe të dijes”, ka shtuar H. Dauti, qytetar nga fshati Haxhaj./ tefik selimi/rajonipress/