Shënohet Dita Botërore e tuberkulozit në Viti me aktivitete vetëdijësuese

Viti – Në kuadër të shënimit të Dita Botërore e Tuberkulozit, Qendra Kryesore e Mjekësisë Familjare (QKMF) në Viti, në bashkëpunim me organizatën Hendikos dhe personat me aftësi të kufizuara, ka organizuar një sërë aktivitetesh vetëdijësuese për qytetarët.

Një nga aktivitetet kryesore ishte ligjërata me temë “Tuberkulozi dhe trajtimi i tij”, e mbajtur nga Dr. Edona Zeka, ku u trajtuan aspektet kryesore të kësaj sëmundjeje, mënyrat e përhapjes, diagnostikimit dhe trajtimit të saj.

Pjesëmarrësit patën mundësinë të informohen drejtpërdrejt dhe të shtrojnë pyetje rreth kujdesit shëndetësor dhe parandalimit.

Në përfundim të ligjëratës, u shpërndanë broshura informuese që përmbajnë këshilla praktike mbi tuberkulozin, si dhe udhëzime për menaxhimin e rasteve të mundshme të infektimit brenda familjes.

Sipas drejtoreshës së QKMF-së në Viti, dr. Vjollca Kadolli Halili, gjatë ditës janë zhvilluar edhe aktivitete të tjera në funksion të rritjes së ndërgjegjësimit të qytetarëve për këtë sëmundje infektive.

Dita Botërore e Tuberkulozit shënohet çdo vit më 24 mars dhe synon të rrisë ndërgjegjësimin mbi pasojat shëndetësore, sociale dhe ekonomike të tuberkulozit, si dhe të nxisë përpjekjet globale për eliminimin e kësaj sëmundjeje./rajonipress/