Shëngjini nën presionin e mbipopullimit: kaos në trafik, mungesë uji e energjie dhe mbeturina kudo

Gjilan – Në kulmin e sezonit veror, Shëngjini po përballet me një fluks të jashtëzakonshëm pushuesish, veçanërisht nga Kosova, të cilët çdo ditë i drejtohen bregdetit shqiptar për të kaluar pushimet. Por përtej pamjeve turistike dhe promocionit të shumtë në rrjetet sociale, realiteti me të cilin përballen shumë prej tyre është dukshëm më pak piktoresk. Mbipopullimi, kolonat e gjata të automjeteve, mungesa e ujit dhe energjisë elektrike, problemet me kanalizimin, mbeturinat e shpërndara në hapësirat publike dhe infrastruktura që shpesh nuk përballon fluksin e madh të turistëve, janë vetëm disa nga problemet që shoqërojnë sezonin e sivjetmë.

Për shumë pushues nga Kosova, aventura nis që në rrugë. Shumica zgjedhin orët e hershme të mëngjesit për të udhëtuar, me shpresën se do t’i shmangin pritjet në kufi dhe kolonat në hyrje të Lezhës. Megjithatë, në ditët me fluks të lartë, pritjet në trafik mund të zgjasin me orë të tëra.

Pas një udhëtimi të lodhshëm, sfidat nuk përfundojnë me mbërritjen në Shëngjin. Edhe ata që kanë bërë rezervime paraprake në hotele apo apartamente, shpesh përballen me një realitet që nuk përputhet me fotografitë dhe videot e publikuara në rrjetet sociale.

Mungesa e hapësirave të sigurta për parkim, problemet me furnizimin me ujë dhe energji elektrike, mungesa e klimës në disa ambiente apo pamundësia për të siguruar shezlongë, janë disa prej shqetësimeve të shprehura nga pushuesit.

Situata bëhet edhe më e pakëndshme kur këtyre problemeve u shtohen mangësitë në shërbim dhe komunikimi jo gjithmonë në nivelin e duhur me turistët.

“Shëngjini nuk e përballon këtë fluks”

Një pushues nga Kosova, Elasai, thotë se Shëngjini nuk ka kapacitetet e nevojshme për numrin e madh të turistëve që e vizitojnë gjatë sezonit.

“Ka mungesë të infrastrukturës, mungesë të pastërtisë, rrugët nuk janë në gjendjen e duhur dhe ka shumë pak interesim nga banorët vendorë që gjërat të ndryshojnë për të mirë”, shprehet ai.

Sipas tij, rritja e numrit të pushuesve nuk është shoqëruar me investime të mjaftueshme në infrastrukturë dhe shërbime.

Shqetësim për gjendjen higjieno-sanitare shpreh edhe një tjetër pushues nga Kosova, Bajrami, i cili thotë se mbipopullimi dhe problemet me pastërtinë mund të krijojnë pasoja serioze.

“Kam shumë frikë se mund të ndodhë ndonjë epidemi apo një gjendje e përgjithshme virale për shkak të numrit të madh të pushuesve”, thotë ai.

Turistja nga Çekia: “Bërlloku është kudo”

Problemet me pastërtinë nuk i kanë shpëtuar as turistëve të huaj.

Anova, një turiste nga Çekia, ka ardhur në Shëngjin së bashku me bashkëshortin e saj shqiptar dhe dy vajzat. Ajo thotë se ka mbetur e kënaqur me ushqimin dhe mikpritjen, por jo me gjendjen e pastërtisë në hapësirat publike.

“Po ndihem mirë sepse ka ushqime të mira tradicionale, por nuk e kuptoj pse bërllogu është kudo. Kur dalim në mbrëmje për të ecur në trotuare, pothuajse çdo 100 metra ka thasë me mbeturina që kundërmojnë rëndë”, shprehet ajo.

Për turisten çeke, kjo është një pamje që nuk e kishte pritur të shihte në Shqipëri.

“Është një pamje që nuk do të kisha dashur ta shihja kurrë në Shqipëri”, thotë Anova.

Turizmi përballë kapaciteteve

Shëngjini, një nga destinacionet më të frekuentuara të bregdetit shqiptar, gjatë verës shndërrohet në një pikë të rëndësishme turistike për vizitorët nga Kosova, Shqipëria dhe vende të tjera.

Por rritja e vazhdueshme e numrit të pushuesve po vendos në provë kapacitetet infrastrukturore dhe shërbimet publike. Për shumë turistë, pushimet në bregdet nuk nisin dhe përfundojnë te deti e plazhi; ato përfshijnë edhe rrugët, parkimin, furnizimin me ujë e energji, pastërtinë, kanalizimin dhe cilësinë e shërbimeve.

Dhe pikërisht këtu, sipas dëshmive të pushuesve, Shëngjini ende ka shumë për të përmirësuar.

Sepse një destinacion turistik nuk matet vetëm me bukurinë e detit, por edhe me mënyrën se si arrin ta përballojë dhe ta mirëpresë fluksin e njerëzve që e zgjedhin atë për pushime.

Apel Bashkisë së Lezhës: Shëngjini ka nevojë për ndërhyrje, jo vetëm për turistë

Në këtë situatë, Bashkia e Lezhës duhet t’i marrë seriozisht shqetësimet e pushuesve dhe të ndërhyjë me urgjencë, jo vetëm për të menaxhuar sezonin aktual, por edhe për të garantuar një zhvillim të qëndrueshëm turistik në vitet e ardhshme.

Shëngjini është një prej pikave më të rëndësishme turistike të veriut të Shqipërisë dhe një destinacion i preferuar për mijëra pushues nga Kosova e më gjerë. Pikërisht për këtë arsye, fluksi i madh turistik duhet të shoqërohet me investime të qëndrueshme në infrastrukturë, kanalizime, furnizim me ujë, energji elektrike, menaxhim të mbeturinave, rrugë, trotuare dhe hapësira parkimi.

Ankesat e pushuesve nuk duhet të shihen thjesht si pakënaqësi individuale, por si sinjale që kërkojnë vëmendje institucionale. Një destinacion që pret mijëra turistë duhet të ketë kapacitetet e nevojshme për t’i shërbyer ata me dinjitet dhe për të garantuar standarde minimale pastërtie, sigurie dhe komoditeti.

Apeli ynë për Bashkinë e Lezhës është që këto shqetësime të mos mbeten vetëm pjesë e debateve të sezonit veror, por të shndërrohen në një plan konkret ndërhyrjesh dhe investimesh.

Shëngjini ka potencial të jashtëzakonshëm turistik, por ky potencial rrezikon të dëmtohet nëse infrastruktura dhe shërbimet publike nuk ecin në të njëjtin ritëm me rritjen e numrit të vizitorëve.

Investimi në Shëngjin nuk është vetëm investim në një zonë turistike; është investim në imazhin e turizmit shqiptar dhe në përvojën e mijëra vizitorëve që, pas pushimeve, do të flasin për atë që kanë parë dhe për mënyrën se si janë trajtuar.

Prandaj, Bashkia e Lezhës duhet të dëgjojë zërin e pushuesve, të evidentojë problematikat dhe të veprojë konkretisht. Sepse turisti mund të vijë një herë për bukurinë e detit, por kthehet vetëm atëherë kur gjen pastërti, infrastrukturë, shërbim dhe një mjedis që e bën të ndihet i mirëpritur./rajonipress/