Shefat, “shuplakë” në vendlindje!
Zyrtarët më të lartë të subjekteve politike, të cilët u angazhuan maksimalisht në fushatën për zgjedhjet e fundit, kanë dështuar rëndë pikërisht në komunat prej nga vijnë. Shumë kandidatë për kryetarë humbën garën, pavarësisht se morën përkrahje të hatashme nga përfaqësuesit e lartë në Qeveri dhe Kuvend. Rezultati zgjedhor dëshmoi se angazhimi i “shefave” ishte kundërproduktiv.
Në këtë “çetë të humbësve” në komunat prej nga vijnë bëjnë pjesë: zëvendëskryetari i PDK-së, Kadri Veseli, pasi që partia e këtij të fundit humbi komunën e Mitrovicës, Hajredin Kuçi, Xhavit Haliti e Adem Grabovci në Pejë, Enver Hoxhaj në Suharekë, Blerand Stavileci, Memli Krasniqi e Vlora Çitaku në Prishtinë, Basri Musmurati në Gjilan, etj.
Debakël pësuan edhe zyrtarët më të lartë të LDK-së në Prishtinë, duke përfshirë këtu kreun e saj, Isa Mustafën dhe shefin e grupit parlamentar, Ismet Beqiri.
Nga radhët e AAK-së, rezultat jo të mirë në komunat prej nga vijnë kanë pasur: Adrian Gjini në Gjakovë, Burim Ramadani në Suharekë, Ahmet Isufi në Gjilan, Blerim Shala në Prishtinë.
Lëvizja “Vetëvendosje” nuk shënoi rezultat të mirë në Pejë dhe Skënderaj, nga vijnë deputetët e saj Florin Krasniqi e Rexhep Selimi. Ndërsa AKR dështoi në Prishtinë prej nga vijnë presidenti Behgjet Pacolli dhe nënkryetari i partisë, Ibrahim Makolli.
S’e pranojnë dështimin
Shefi i Grupit parlamentar të PDK-së, Adem Grabovci, thotë për “Zëri” se nuk ka qenë i angazhuar në zgjedhjet lokale vetëm në komunën e Pejës, por edhe në atë të Gjakovës e të Deçanit dhe se kjo parti, sipas tij, në këto komuna ka arritur një sukses të konsiderueshëm…(Zëri)