SHBA udhëhoqi politikën për ta bërë shtet Kosovën!

Dita e Përkujtimit, festë kjo kombëtare amerikane, u shënua të hënën edhe në Kosovë. Me lutje për ushtarët e rënë në luftëra e për familjet e tyre ka nisur Dita e Përkujtimit edhe në bazën më të madhe ushtarake amerikane në Ballkan, Bondsteel, në Ferizaj.

“Dita e Përkujtimit është një mirënjohje e madhe për ushtarët amerikanë. Është pak e dhimbshme duke kujtuar të gjithë ushtarët që kanë vdekur për vendin, por në të njëjtën kohë është inkurajuese për të gjithë ushtarët, sepse ne vendosim Amerikën përpara jetës sonë dhe kjo është një gjë e bukur”, deklaroi Toger Anderson, njofton KTV, raporton Koha.

Publicisti Veton Surroi, i cili ishte anëtar i Grupit të Unitetit në bisedimet për zgjidhjen e statusit të Kosovës, i pranishëm në këtë festë, ka kujtuar kontributin e Shteteve të Bashkuara të Amerikës në shtetndërtimin e Kosovës.

“Në momentet kritike të historisë së Kosovës, SHBA-ja udhëhoqi një intervenim për të shpëtuar njerëzit e Kosovës nga gjenocidi. Në momentet kritike të historisë, SHBA udhëhoqi politikën për t’i dhënë Kosovës pavarësinë. Për këtë, mirënjohja për SHBA-në është e padiskutueshme sidomos për ushtrinë amerikane, të cilët kanë kaluar shumë që nga bërja e paqes e deri te ruajtja e saj në Kosovë”, është shprehur ndër të tjera Surroi. /Telegrafi/

Shpërndaje.
© RAJONIPRESS