SHBA-ja premton përkrahje për BQK-në

Guvernatori i Bankës Qendrore të Republikës së Kosovës, Bedri Hamza, ka pritur sot Ambasadorin e Shteteve të Bashkuara të Amerikës në Kosovë, Greg Delawie, shoqëruar nga drejtori i USAID-it, James Hope, dhe Drejtori i Zyrës për Rritje Ekonomike e USAID-it, Scott Cameron, njofton kumtesa nga BQK.

Në këtë takim, ka falënderuar ambasadorin Delawie për mbështetjen e vazhdueshme që BQK-ja ka marrë nga Qeveria e SHBA-së, duke u shprehur i bindur që ky bashkëpunim do të vazhdojë edhe në të ardhmen.

Po ashtu, Guvernatori Hamza ka informuar ambasadorin Delawie lidhur me zhvillimet e fundit në sektorin financiar, në përgjithësi, dhe në sektorin bankar, në veçanti.

Hamza ka theksuar se sektori financiar në Kosovë vazhdon të jetë i qëndrueshëm, likuid dhe i kapitalizuar mirë dhe me zhvillime pozitive. Ai e ka njohur ambasadorin Delawie me të dhënat e vitit 2015 në sistemin bankar, duke theksuar se edhe në vitin e kaluar, bankat kanë pasur një afarizëm mjaft pozitiv, me rritje pozitive të kreditimit dhe të depozitave, si dhe me një nivel të ulët të kredive joperformuese.

Ambasadori Delawie ka çmuar angazhimin e Bankës Qendrore të Republikës së Kosovës për rregullimin e Sektorit Financiar si dhe ka nënvizuar se Shtetet e Bashkuara do të thellojnë bashkëpunimin dhe do vazhdojnë të mbështesin Bankën Qendrore të Republikës së Kosovës në fusha të ndryshme të cilat ndihmojnë në avancimin e funksioneve të saja.