Shaqiri në radarin e Romës

Lideri i Serie A, Roma po mendon ta përforcoj skuadrën. Sipas mediave italiane klubi romak po mendon ta transferoj Xherdan Shaqirin nga Byern Munchen.

Mediat italiane shkruajnë se trajneri i Romës, Rudi Garcia ka folur me drejtuesit e ekipit për blerjen e mundshme të mesfushorit kosovar.

22-vjeçari u ble në verë të 2012 për 12 milionë euro nga Baseli, çka do të thotë se nëse Roma dëshiron vërtet të sigurojnë shërbimet e tij, duhet të paguajnë të paktën 15 milionë euro.

Kontrata e gjilanasit me klubin bavarez skadon më 2016, por duke parë hapësirat e pakta që mesfushori i kombëtares së Zvicrës po gjen në formacionin e Pep Guardiolës një transferim i mundshëm në ‘Olimpico’ nuk është i pamundshëm.

Romakët mund të hidhen në sulm për Shaqirin që në muajin Janar, sigurisht nëse do të ruajnë pozicionin e tyre në krye të Serisë A, por edhe ky skenar mbetet pak i besueshëm për faktin se 22-vjeçari nuk do të mund të hiqte dorë nga pjesëmarrja në Ligën e Kampionëve, çka ia siguron Bayerni.

Për këtë arsye, Roma me shumë mundësi do të presë afatin kalimtar të verës për të përgatitur një ofertë konkrete për Xherdan Shaqirin.