“Shaqa katër asiste” dhe një gol – Bayerni në finale të Kupës

Bayern Munich ka arritur edhe një sukses në këtë sezon. Disa ditë pasi u shpallën edhe matematikisht kampion të Bundesligas gjermane, bavarezët me fitoren prej 6:1 kundër Wolfsburg, kanë siguruar një biletë për në finalen e Kupës së Gjermanisë.

Epërsinë e parë “Rekordmesiter” e krijuan në minutën e 17-të të ndeshjes me anë të sulmuesit kroat, Mario Mandzukiq, i cili morri një pasim të saktë nga Arjen Robben, që paraprakisht u shërbye nga ana e mesfushorit shqiptar, Xherdan Shaqiri.

“Shaqa” ishte protagonist edhe në golin e dytë të Bayrnit, pasi që në një solo aksion të organizuar në minutën e 35-të, pasoi për mrekulli në drejtim të holandezit, Robben, të cilit i mbeti vetëm të dërgoi topin në rrjetë.

Edhe në vazhdim të ndeshjes ekipi nga Munichu kërkoi golin e tretë, por kur pritej të përfundonte pjesa e parë me dy gola epërsi për ekipin e Shaqirit, lojtarët e Wolsgurgut zvogëluan epërsinë e “të kuqve” pas një kundërsulmi të shpejtë me anë të mesfushorit brazilian, Diego, i cili mposhti portierin, Manuel Neuren, me anë të një goditje të fuqishme.

Me sa duket kjo ishte nata e Shaqirit, pasi që qysh në minutat e parë të pjesës së dytë, bavarezët i solli sërish në epërsi prej dy golash. Pas një goditje precize nga rreth 18 metra, “Shaqa”, shënoi golin e tretë për Bayernin në minutën e 51-të.

Gjithashtu edhe në golin e katërt të shënuar në minutën e 80-të nga Gomez, Shaqiri ndonëse ishte në pozitë për të shënuar golin e dytë personal, ai nuk u tregua egoist dhe shërbeu sulmuesin gjerman, i cili shënoi edhe golin e pestë për bavarezët, dy minuta pas atij të parit. Me kaq nuk u ndal Gomez, pasi që shënoi golin e tretë personal, përkatësisht të gjashtin për bavarezët, në minutën e 86-të.

Megjithëse te dyja ekipet në vazhdim të ndeshjes kërkuan të shënonin edhe ndonjë gol, ballafaqimi përfundoi me rezultatin të cilin e vendosi Gomez, 6:1 në dobi të bavarezëve.

Ndërsa të besuarit e trajnerit, Jupp Heynckes rivalin e tyre të finales do ta mësojnë tek nesër, pasi që në gjysmëfinalen tjetër të “DFB Cup” do të takohen VfB Stuttgart dhe Freiburg.

Kujtojmë se ‘Shaqa’ me shokë të premten e kaluar ka mësuar edhe kundërshtarin e gjysmëfinales së Champions League, ku pas hedhjes së shortit në Nyon të Zvicrës, është bërë e ditur se Bayerni do të takohet me gjigantin spanjoll, Barcelonën.(tribuna)