Shantazhohen të sëmurët nga zemra

Pacientët kosovarë që vuajnë nga sëmundjet e zemrës janë në hall të madh me sistemin shëndetësor publik. Nëse atyre u rekomandohet të ekzaminohen me korenaorografi (teknologji kjo që zbulon ngushtimin e arterieve), duhet të presin me javë të tëra derisa të rregullohet aparati, i cili më shumë rri i prishur se sa në gjendje të rregullt.

Edhe pse në Qendrën Klinike Universitare thonë se defektet janë të natyrshme, mjekët që i takojnë taborit opozitar hedhin dyshime se vonesat e servisimit çojnë në “shantazh”, këtë për faktin se në klinikat private kurrë nuk prishet aparati.

Ndryshe, ka tri javë që në repartin e Kardiologjisë Invazive në Qendrën Klinike Universitare të Kosovës nuk është kryer asnjë koronarografi për shkak të prishjes apo harxhimit të gypit katodik të aparatit koronarografik, i cili as të enjten deri në orët e pasdites nuk është rregulluar.

E ndërkaq ekspertët shëndetësorë vonesën e riparimit të këtij aparati e shohin si neglizhencë nga ana e menaxhmentit të QKUK-së dhe të Ministrisë së Shëndetësisë.

Sami Gjoka, shef i repartit të Kardiologjisë Invazive, ka deklaruar për gazetën “Zëri”, se me kohë janë njoftuar të gjitha instancat për prishjen e gypit, por që sipas tij, ka tri javë që akoma nuk është bërë asgjë në këtë drejtim.

“Ne kemi bërë apel çdo ditë, kam njoftuar edhe instancat më të larta duke filluar nga drejtori i klinikës, drejtorin ekzekutiv, Ministrinë e Shëndetësisë dhe të gjitha këto instanca i kanë marrë hapat e duhur dhe të shohim tash se çfarë do të bëhet”, ka treguar Gjoka, i cili shtoi se gjatë këtyre tri javëve nuk është kryer asnjë koronarografi.

“Ka tri javë që asnjë pacient nuk ka mundur të bëjë koronarografi dhe është një numër prej 50 pacientëve të cilët janë në listë të pritjes të riparimit të kësaj aparature dhe nëse rregullohet javën e ardhshme nuk besoj se do të ketë listë të pritjes”, tregoi tutje Gjoka…(Zëri)