Shala: Ndërkombëtarët po thonë se jemi sa afër, aq larg marrëveshjes me Serbinë

Blerim Shala, këshilltar politik i presidentit të Kosovës, Hashim Thaçi, ka thënë se një marrëveshje për njohje reciproke mes Kosovës e Serbisë do t’i zgjidhte të gjitha problemet ekzistuese mes dy vendeve.
Shala, gjatë një paraqitjeje në emisionin “Pressing”, në televizionin T7, ka vlerësuar se “një hap i vogël na ndan prej marrëveshjes”.

Ai gjithashtu ka kujtuar një vlerësim të diplomatëve perëndimorë për situatën. “Jeni shumë afër, por jeni shumë larg njëkohësisht”, ka treguar Shala të ketë dëgjuar nga ndërkombëtarët.

Ai ka thënë se qëndrimi përfundimtar i Serbisë vazhdon t’i lërë gjërat në mjegull.

“S’e dimë qëndrimin final të Serbisë. E dimë qëndrimin e Uashingtonit, e të Parisit, e të Londrës”, ka thënë ai.

Sipas Shalës, “nuk ka datë konkrete apo periudhë konkrete kur mund të bëhet një marrëveshje”. /Express/