Prishtinë, 25 maj – Akuza të reja ndërmjet deputetëve të pozitës dhe opozitës. Myzejene Selmani nga Koalicioni Kosova e Re ka akuzuar Eqrem Kryeziun e LDK-së si njeri të krimit ekonomik, që në prapaskenë punon për kryeministrin Thaçi dhe se po i pengon puna që po bëhet në Ministrinë e Tregtisë dhe Industrisë.
Ndërsa, deputeti Eqrem Kryeziu ka deklaruar se krejt kjo replikë me deputeten Selmani ka të bëjë me faktin se ai i ka përmendur një gjë, e cila e ka penguar deputeten. Faktin që ka ngritur shqetësimin për largimin nga puna të një zyrtari nga ministrja Mimoza Kusari-Lila e AKR-së. Kryeziu ka mohuar akuzat se në prapaskenë punon për kryeministrin e vendit, transmeton KTV.
Nga ana tjetër, në seancën e Kuvendit janë miratuar raporti i Komisionit të Pavarur për Miniera dhe Minerale për vitin 2011, propozimi i Qeverisë lidhur me Listën për Rentat Minerare dhe është miratuar propozimi i Institutit Gjyqësor të Kosovës për emërimin e anëtarëve të Këshillit Drejtues të këtij institucioni. Gjithashtu janë miratuar pesë raporte vjetore të agjencive të ndryshme.
