Selimi: Ata njerëz që e kanë shitur shtetin, po e blejnë drejtësinë

Deputeti nga Lëvizja ‘Vetëvendosje!’, Rexhep Selimi ka nënvizuar për gazetën “Kosova Sot” se kur korrupsioni është i pranishëm edhe në sistemin e drejtësisë, e aq më tepër kur është në baza politike, ai do të duhej të dënohej në atë shtet.

“Pra, dëgjueshmëria në mes pushtetit të korruptuar dhe sistemit të drejtësisë prodhon pastaj riciklim, ose e riciklon krimin. Kështu që sot drejtësia është në duart e atyre të cilët shtetin e kanë shitur dhe drejtësinë po vazhdojnë ta blejnë. Pra, ata njerëz që e kanë shitur shtetin po e blejnë drejtësinë, derisa në sistemin e drejtësisë paraja sot mund të gjejë ‘fole’, dhe vend”, ka theksuar ai.

Selimi ka thënë se fatkeqësisht pajtohet me atë se sot paraja përcakton anën e drejtësisë.

“Kjo nuk do të duhej të ndodhte në një shtet ligjor, por te ne nuk bëhet fjalë për një shtet të tillë”, ka potencuar ai.